Ukraine: Babiri bapfuye abandi benshi barakomereka mu gitero cy'Uburusiya ku kigo cy'ubucuruzi

Abategetsi bavuze ko abantu nibura babiri bishwe naho abandi 27 barakomereka mu gitero cy'Uburusiya cyo mu kirere ku kigo cy'ubucuruzi no ku isoko mu mujyi wa Dobropillia, mu karere ka Donetsk mu burasirazuba bwa Ukraine.

Guverineri w'ako karere Vadym Filashkin yatangaje ku rubuga nkoranyambaga rwa Telegram ko amaduka arenga 50, amacumbi arenga 300 n'imodoka umunani byangijwe n'icyo gitero cyo ku mugoroba wo ku wa gatatu.

Mu ijambo asanzwe avuga buri mugoroba, Perezida wa Ukraine Volodymyr Zelensky yavuze ko icyo gitero "giteye ubwoba gusa", anavuga ko "nta shingiro rya gisirikare" gifite. Uburusiya nta cyo bwatangaje.

Iki gitero kibaye mu gihe intumwa yihariye y'Amerika muri Ukraine, Keith Kellogg, iri mu murwa mukuru Kyiv wa Ukraine, mu ruzinduko rw'icyumweru rwo kuganira na Zelensky ku bufatanye bw'Amerika na Ukraine.

Ku wa gatatu, Guverineri Filashkin yanditse kuri Telegram ati: "Abarusiya bongeye kurasa ku bushake ku gace karimo abantu benshi - ikigo cy'ubucuruzi kiri rwagati mu mujyi."

"Kuri iyi nshuro bakoresheje igisasu kirasiwe mu kirere gipima ibiro 500."

Filashkin yavuze ko icyo gisasu cyarekuriwe hasi saa kumi n'imwe n'iminota 20 z'umugoroba (17:20) ku isaha yaho, ni ukuvuga saa kumi n'iminota 20 z'umugoroba (16:20) ku isaha yo mu Rwanda no mu Burundi, ubwo ako gace kari karimo abantu benshi bagiye guhaha.

Umujyi wa Dobropillia, uri mu ntera ya kilometero 20 uvuye ku murongo w'imbere wo ku rugamba, ukaba uri mu majyaruguru ashyira uburasirazuba bw'umujyi wa Pokrovsk - ahantu Uburusiya burimo kwibanda mu gutera intambwe gahoro gahoro mu karere ka Donetsk.

Umujyi wa Dobropillia wakomeje kugabwaho ibindi bitero kuva Uburusiya bugabye igitero gisesuye kuri Ukraine mu mwaka wa 2022.

Muri Werurwe (3) uyu mwaka, igitero cya rokete, misile n'indege nto z'intambara zitajyamo umupilote (zizwi nka 'drone') cyishe abantu 11 muri uwo mujyi, barimo n'abana batanu.

Hagati aho, umuyobozi ('Mayor') w'umurwa mukuru Moscow (Moscou)w'Uburusiya, Sergei Sobyanin, yavuze ko minisiteri y'ingabo y'Uburusiya yahanuye 'drone' eshatu zagurukaga zerekeza i Moscow mu masaha ya kare yo mu gitondo cyo kuri uyu wa kane.

Yavuze ko urwego rw'ubutabazi bwihuse rurimo gukorera aho ibisigazwa byaguye ariko ntiyavuze niba hari abapfuye cyangwa abakomeretse. Ukraine nta cyo yavuze kuri ibyo bitero.

Ibi bibaye nyuma yuko ku wa kabiri Perezida w'Amerika Donald Trump avuze ko Ukraine idakwiye kugaba ibitero kuri Moscow, nyuma yuko ikinyamakuru the Financial Times cyo mu Bwongereza gitangaje ko ku itariki ya 4 y'uku kwezi kwa Nyakanga (7) Trump yari yashishikarije Ukraine mu ibanga kongera ibitero ku Burusiya.

Kuva mu byumweru bya vuba aha bishize, Uburusiya bwongereye ibitero byabwo bya 'drone' na misile mu bice bitandukanye bya Ukraine, byishe abasivile barenga 230 mu kwezi gushize kwa Kamena (6), nkuko Umuryango w'Abibumbye ubivuga.

Uwo ni wo mubare wa mbere munini cyane w'abishwe mu kwezi kumwe, muri iyi ntambara imaze imyaka irenga itatu.

Trump amaze igihe arimo kubihirwa kurushaho kubera ko umuhate we wo kurangiza intambara utagejeje ku gahenge cyangwa ngo utume haterwa intambwe ikomeye yerekeza muri uwo mujyo.

Nyuma y'inama yo ku wa mbere yagiranye n'umukuru w'umuryango wo gutabarana w'Uburayi n'Amerika (OTAN), Mark Rutte, yabereye i Washington, Trump yavuze ko yatengushywe na Perezida w'Uburusiya Vladimir Putin, ndetse ko "kuganira neza cyane kuri telefone" na Putin akenshi gukurikirwa n'ibitero by'Uburusiya byo mu kirere kuri Ukraine.

Trump yagize ati: "Nyuma yuko ibyo bibaye inshuro eshatu cyangwa enye, uravuga uti: kuganira nta kintu na kimwe bimaze."

Yaburiye ko azafatira Uburusiya ibihano bikomeye niba amasezerano y'amahoro atagezweho mu minsi 50.

Trump yanatangaje ko Amerika izoherereza Ukraine "intwaro za mbere zikomeye cyane", binyuze mu bihugu byo muri OTAN bizazishyura, kugira ngo "Ukraine ishobore gukora icyo ishaka gukora".