Museveni yatsindiye manda ya karindwi izageza mu 2031

Komisiyo y'amatora ya Uganda yemeje ko Yoweri Museveni yatsinze amatora ya perezida n'amajwi 71% mu gihe uwo bari bahatanye cyane Robert Ssentamu uzwi cyane nka Bobi Wine yagize amajwi 24% naho abandi bakandida batandatu uwaje hafi yagize 1%.

Ibyavuye mu matora yabaye ku wa kane bitangajwe nyuma y'amasaha macye Bobi Wine atangaje amashusho avugamo ko "ibigiye gutangazwa na Byabakama [perezida wa komisiyo y'amatora] ari 'fake' [atari byo]".

Ibyatangajwe bisobanuye ko Yoweri Museveni w'imyaka 81 atorewe manda ya karindwi yikurikiranya nka perezida wa Uganda izatuma aguma ku butegetsi kugeza mu 2031.

Ibyavuye mu matora bitangajwe nyuma y'iminsi itanu internet ikuweho muri Uganda.

Leta ivuga ko yafashe iki cyemezo mu rwego rwo kubungabunga umutekano w'igihugu muri iki gihe cy'amatora no kwirinda amakuru atari yo.

Bobi Wine n'abo mu ishyaka rye NUP bavuga ko gufunga internet "bigamije gukora uburiganya mu matora, isi itareba ibirimo kuba".

Kubera kubura internet mu gihugu byagoye BBC n'ibindi binyamakuru byigenga kugenzura ibyabaye mu matora no kugenzura ibyayavuyemo.

Komisiyo y'amatora yavuze ko abatoye bose hamwe ari abantu miliyoni 11.3 bangana na 52% by'abari biyandikishije gutora. Iyi komisiyo ivuga ko amajwi agera ku bihumbi 275 yabaye impfabusa, ayo akangana na 2.4%

Ibiro ntaramakuru AFP bisubiramo umwe mu ndorerezi z'amatora, Goodluck Jonathan wahoze ari perezida wa Nigeria, avuga ko yabayemo ibikorwa "byo gutera ubwoba, guta muri yombi no gushimuta" byibasiye abatavuga rumwe n'ubutegetsi n'abo muri sosiyete sivile.

Mu butumwa bwa video yacishije kuri Facebook ye, Bobi Wine yahamagariye abanya-Uganda "guhaguruka bakamagana ibiva mu matora" we avuga ko "komisiyo y'amatora yibiye Museveni".

Bobi Wine avuga ko ari ahantu hatazwi nyuma yo gucika inzego z'umutekano zari zamufungiye iwe mu rugo n'umuryango we aho atuye i Magere hanze gato y'umurwa mukuru Kampala.

Igipolisi cya Uganda uyu munsi cyatangaje ko ibivugwa na Bobi Wine n'abamushyigikiye ko ubuzima bwe buri mu kaga ari ibinyoma.

Igipolisi kandi cyasabye abantu kugumana ituze no kwirinda ibikorwa ibyo ari byo byose by'imigumuko nyuma y'amatora y'umukuru w'igihugu.

Bimwe kuri Perezida Museveni

Abanya-Uganda bari munsi y'imyaka 40, barenga bitatu bya kane by'abaturage bose b'iki gihugu, nta wundi perezida bazi uretse Museveni

Yafashe ubutegetsi mu 1986 nyuma yo guhirika ubutegetsi bwariho. Kuva icyo gihe kugeza ubu ni we utegeka kandi intsinzi y'uyu munsi yerekana ko nta kimenyetso cy'uko ashaka kuva ku butegetsi.

Igihe amaze ayobora igihugu cyaranzwe n'igihe kirekire cy'amahoro n'iterambere rifatika, ari byo bituma benshi bamushima.

Ku rundi ruhande, abamunenga bavuga ko yakomeje kugundira ubutegetsi akoresheje uburyo bwo gucecekesha abatavuga rumwe na we no guca intege inzego zigenga.

Yigeze kubwira BBC ati: "Ntitwizera igihe manda z'umukuru w'igihugu zigomba kumara," ibi yabivuze nyuma yo gutsinda amatora, kuri manda ye ya gatanu.

Urugendo rwa Museveni rwatangiye mu 1944, avukira mu muryango w'aborozi b'inka mu gace ka Ankole, mu majyepfo ashyira uburengerazuba bwa Uganda.

Museveni yakuze mu bihe Uganda yarwaniraga ubwigenge bwayo ku Bwongereza, bikurikirwa n'igihe cy'ubugome n'imvururu byatewe n'ubutegetsi bwa Milton Obote na Idi Amin Dada.

Mu myaka myinshi, Museveni ntiyari azi itariki y'amavuko ye. Mu nyandiko yanditse ku buzima bwe bwite, yagize ati: "Twari mu bibazo bikomeye byashyiraga ubuzima bwacu mu kaga nko kwicwa, gusahurwa, n'ibindi. Ntitwari dufite umwanya wo kwita ku bintu nk'ibyo by'amatariki y'amavuko."

Mu 1967, Museveni yavuye muri Uganda ajya kwiga muri kaminuza ya Dar es Salaam muri Tanzaniya, aho yize ubukungu n'ubumenyi bwa politiki, ahava ashimangiye umubano wihariye n'abanyeshuri bari bafite ibikorwa bya politiki baturukaga mu bihugu bitandukanye by'akarere.

Izina rya Museveni ryatangiye kumenyekana cyane mu myaka ya 1970, nyuma yo guhirika ubutegetsi bikozwe na Idi Amin na we wamamaye cyane muri Uganda.

Mu 1981, yatangije intambara mu buryo bweruye, hashize imyaka itanu, umutwe we w'inyeshyamba, National Resistance Movement (NRM), ufata ubutegetsi maze Museveni aba umuyobozi w'igihugu atyo.

Museveni ubwe yari yaravuze mu 1986 ko: "Ikibazo cya Afurika muri rusange, n'icya Uganda by'umwihariko, si abaturage ahubwo ni abayobozi bashaka kumara igihe kinini ku butegetsi."

Ariko mu 2005, ibyo yizeraga byarahindutse: itegeko nshinga ryahinduwe, rikurwamo umubare ntarengwa wa manda perezida yemerewe kumara ku butegetsi.

Mu 2017 nabwo, imyaka ntarengwa ku mukandida wiyamamariza kuba Perezida yakuweho.