Kinshasa: Constant Mutamba wari Minisitiri w'ubutabera yakatiwe imirimo y'agahato kubera kunyereza umutungo

Urukiko rusesa imanza rwo muri Repubulika ya Demokarasi ya Congo rwakatiye Constant Mutamba wahoze ari Minisitiri w'ubutabera kumara imyaka itatu akora imirimo y'agahato nyuma yo guhamwa no kunyereza amafaranga yari agenewe kubaka gereza i Kisangani mu majyaruguru ashyira uburasirazuba bw'igihugu.

Amakuru yo mu bitangazamakuru byo muri DRC avuga ko Mutamba yanahanishijwe kumara imyaka itanu adashobora gutora no gutorwa, anategekwa gusubiza miliyoni 19 z'amadolari urukiko rwanzuye ko yanyereje.

Muri uru rubanza rwamaze amezi hafi atatu, Mutamba, w'imyaka 37, yakomeje guhakana ibyo yaregwaga, avuga ko ari umwere, kandi ko abamukuriye batigeze bagaragaza impungenge ubwo isoko ryo kubaka iyo gereza ryahabwaga kompanyi y'ubwubatsi Zion Construction, n'ayo mafaranga, nkuko Radio RFI ibitangaza.

Radio Okapi iterwa inkunga n'Umuryango w'Abibumbye ikorera muri DRC, isubiramo amagambo y'umucamanza ukuriye inteko iburanisha Jacques Kabasele avuga ko Mutamba atemerewe gukora imirimo ya leta cyangwa ishamikiye kuri leta.

Urwo rukiko rwo mu murwa mukuru Kinshasa rwanategetse ko mbere yuko igihano yakatiwe kirangira atemerewe kurekurwa. Yanasabwe kuriha amagarama (amafaranga) y'urubanza.

Abanyamategeko bamuburanira bavuze ko umukiliya wabo yagaragaje imyitwarire myiza, ibyo bikagaragazwa, nkuko babivuze, no kuba ayo mafaranga ataraburiwe irengero.

Ariko urukiko rusesa imanza rwanzuye ko Mutamba yakoze "agamije gukungahaza mu buryo bunyuranyije n'amategeko sosiyete [kompanyi] Zion Construction, ari na ko agaragaza ubushake bwo kunyereza umutungo no mu gukoresha uburyo bunyuranyije n'imikorere isanzwe", nkuko Radio Okapi yabitangaje.

Nyuma yo gukatirwa icyo gihano ku wa kabiri n'urukiko rusesa imanza, Mutamba ntiyemerewe kujurira.

Abamushyigikiye bari bakoze imyigaragambyo yo kwamagana itabwa muri yombi rye ndetse mu cyumweru gishize isomwa ry'uru rubanza ryari ryasubitswe kubera ubushyamirane hagati y'impirimbanyi zimushyigikiye na polisi i Kinshasa, nkuko ibiro ntaramakuru Reuters byabitangaje.

Ku isomwa ry'urubanza rwe, Radio RFI ivuga ko umutekano wari wakajijwe, Mutamba asohoka nk'uko yari yinjiye mu rukiko, azamuye igipfunsi.

Muri Gicurasi (5) uyu mwaka, umushinjacyaha mukuru w'urukiko rusesa imanza yari yasabye inteko ishingamategeko kwambura ubudahangarwa Constant Mutamba kugira ngo akurikiranwe mu nkiko.

Mutamba yabaye Minisitiri w'ubutabera mu gihe cy'umwaka umwe hagati y'umwaka wa 2024 kugeza muri Kamena (6) uyu mwaka, ubwo yeguraga ku mirimo ye kubera urwo rubanza rwari rumutegereje.

Mu ibaruwa y'ubwegure bwe, yagarutse ku mavugurura akomeye avuga ko yakoze mu kunoza imikorere y'ubucamanza, anashinja u Rwanda, nta gihamya atanze, kuba ruri inyuma y'urwo rubanza.

Yanditse ati: "Birababaje kuba mu gihe... ndimo gukurikirana abakuru ba AFC/M23, ntunguwe no gusogotwa mu mugongo, binyuze mu mugambi wa politike bigaragara ko wacuriwe i Kigali ndetse ugashyirwa mu bikorwa na bamwe mu bo dusangiye igihugu, ugamije kugabanya uwo murindi w'amavugurura no gukunda igihugu."

Ibihugu byinshi byo mu burengerazuba bw'isi na raporo z'inzobere za ONU bashinja u Rwanda gufasha M23 mu ntambara yongeye kubura mu burasirazuba bwa DRC kuva mu mpera y'umwaka wa 2021. U Rwanda rurabihakana.

Muri Mata (4) uyu mwaka, minisiteri y'ubutabera yari iyobowe na Mutamba yemeje ikurikiranwa mu nkiko rya Joseph Kabila wahoze ari Perezida wa DRC, ashinjwa ubugambanyi bwo gukorana n'umutwe w'inyeshyamba wa M23 urwanya ubutegetsi bwa Kinshasa.

Ubushinjacyaha mu rukiko rukuru rwa gisirikare ruherutse gusabira Kabila igihano cy'urupfu.