Minisitiri w'ubutabera wa DRC 'yeguye' avuga ko ari 'umugambi wacuriwe i Kigali'

Minisitiri w'ubutabera wa DR Congo yeguye ku mirimo ye mbere y'uko atangira gukurikiranwa ku byaha acyekwaho byo kunyereza umutungo wa leta, nk'uko byemezwa na radio-televiziyo y'icyo gihugu isubiramo inyandiko ivuga ko yabonye yo kwegura kwe.

Muri iyo nyandiko, isubirwamo kandi n'ibiro ntaramakuru bya Congo, ACP, Constant Mutamba avuga ko yeguye kubera 'umugambi wa politike' wo kumugambanira "biboneka ko wacuriwe i Kigali ugashyirwa mu ngiro na bamwe mu bo dusangiye igihugu". Nta kimenyetso yagaragaje cy'ibi ashinja u Rwanda.

Mutamba, w'imyaka 37, yakunze kumvikana ashinja u Rwanda gutera DR Congo binyuze mu gufasha umutwe wa M23, ikirego ruhakana.

Abantu benshi ku mbuga nkoranyambaga bagaragaje gutangazwa no kuba Mutamba yavuze ko yeguye kubera 'umugambi wacuriwe i Kigali'.

Uruhande rw'u Rwanda ntacyo rwavuze ku bivugwa muri iyo nyandiko yo kwegura kwa Constant Mutamba.

Muri iyo nyandiko yandikiye Perezida Félix Tshisekedi isubirwamo n'ibinyamakuru byinshi muri DR Congo, Mutamba avuga impinduka zitandukanye, akavuga ko zashimwe na Tshisekedi.

Avuga ko umugambi wo kumweguza ugamije guhagarika izo mpinduka, kandi ko intego nyamukuru y'ibyo ari uko abakuriye umutwe wa AFC/M23 bashaka kumwica. Nta bimenyetso yerekanye.

Ibiro ntaramakuru bya Congo (ACP) bivuga ko Constant Mutamba yatanze ubwegure bwe ku mukuru w'igihugu ku wa gatatu nyuma y'uko umunsi wabanje yari yakiriwe na Perezida Tshisekedi.

Kugeza ubu ariko, Mutamba arakekwaho gushaka kunyereza miliyoni z'amadorari yari agenewe kubaka gereza ya Kisangani mu majyaruguru ashyira uburasirazuba bwa DR Congo.

Ku cyumweru gishize, inteko ishingamategeko ya Congo yahaye umushinjacyaha i Kinshasa uburenganzira bwo gutangira gukurikirana uyu mutegetsi mu nkiko. Amategeko ya DR Congo ateganya ko yagombaga kwegura ku mirimo ye mbere y'uko atangira gukurikiranwa.

Mu nyandiko yo kwegura kwe isubirwamo n'ibinyamakuru muri DR Congo, Mutamba yagize ati: "Nta dorari na rimwerya leta nafashe."

Asa n'uwiregura, yavuze ko impinduka yatangije hari abatsimbaraye ku bya kera bazirwanya kuko zisenya imikorere y'amatsinda yita aya 'mafia'.

Iyi nkuru y'iperereza ku birego byo kunyereza imari ya leta Constant Mutamba akekwaho, hamwe n'uku kwegura kwe, ni imwe mu zavuzwe cyane mu karere muri iyi minsi.

Mu gihe gishize, Mutamba yumvikanye avuga ko hari gahunda yo gushyiraho urwego rw'ubucamanza aho umuntu uhamwa no kunyereza umutungo wa leta akwiye kujya akatirwa igihano cy'urupfu.