M23 ivuga ko igiye korohereza ingabo za SADC kuva i Goma

Umutwe w'inyeshyamba wa M23 urwanya ubutegetsi bwa Repubulika ya Demokarasi ya Congo uvuga ko wiyemeje korohereza ingabo z'umuryango w'ibihugu by'Afurika y'amajyepfo (SADC) mu gusubira iwabo "aka kanya" zivuye i Goma, aho zaheze kuva uyu mutwe ufashe uwo mujyi mu mezi abiri ashize.

Mu itangazo rihuriweho na M23 na SADC rya nyuma y'inama y'impande zombi yabereye i Goma ku wa gatanu, M23 ivuga ko izi ngabo zo mu butumwa buzwi nka SAMIDRC zizasubira iwabo "n'intwaro zazo n'ibikoresho zigasiga intwaro zose za FARDC [ingabo za leta ya DRC] n'ibikoresho bya FARDC zifite".

Nta cyo leta ya DRC yari yatangaza ku mugaragaro kuri iyi nama.

Kinshasa, ONU n'ibihugu byinshi byo mu burengerazuba bashinja u Rwanda gufasha umutwe wa M23, ibyo mu bihe bya vuba aha bishize Kigali itemeye cyangwa ngo ihakane mu buryo bweruye.

Iyi nama ibaye nyuma yuko muri uku kwezi abategetsi ba SADC bemeje ko bagiye gukura ingabo mu burasirazuba bwa DRC, aho zari zageze mu Kuboza (12) kw'umwaka wa 2023 gufasha ingabo za leta kurwanya umutwe wa M23.

Abasirikare bicyekwa ko barenga 1,000 boherejwe n'ibihugu by'Afurika y'Epfo, Malawi na Tanzania, bari mu bigo biri i Goma no mu nkengero zayo ahitwa Mubambiro aho barinzwe n'umutwe wa M23.

Abasirikare nibura 19 bo muri Afurika y'Epfo, Malawi na Tanzania barishwe ubwo M23 yafataga umujyi wa Goma, umurwa mukuru w'intara ya Kivu ya Ruguru, muri Mutarama (1) uyu mwaka.

Abantu babarirwa mu bihumbi biciwe mu mirwano ndetse abandi babarirwa mu bihumbi amagana basigaye nta ho bafite ho kwikinga nyuma yo guta ingo zabo.

Ku ruhande rwa SADC, inama yo ku wa gatanu yari yitabiriwe na Profeseri Kula Theletsane ukuriye akanama ka politike n'umutekano muri uwo muryango.

Yari irimo kandi umugaba mukuru w'ingabo z'Afurika y'Epfo Jenerali Rudzani Maphwanya, uw'ingabo za Zambia Liyetona Jenerali Geoffrey Zyeele, Jenerali Majoro Saiford Kalisha uhagarariye umugaba mukuru w'ingabo za Malawi, na Jenerali Majoro Ibrahim Mhona uhagarariye umugaba mukuru w'ingabo za Tanzania.

M23 yari ihagarariwe n'umugaba mukuru wayo Jenerali Majoro Sultani Makenga n'umwungirije Brigadiye Jenerali Bernard Byamungu, hamwe na Guverineri Bahati Musanga Erasto ukuriye ubutegetsi bwa M23 mu ntara ya Kivu ya Ruguru.

M23 ivuga ko izafasha mu gutuma ingabo za SAMIDRC zisanzura mu ngendo mu gihe zitegura gusubira iwabo "bijyanye n'amahame yemeranyijweho".

Impande zombi zemeranyije no korohereza itsinda rya tekinike ryazo ryo gusuzuma uko ikibuga mpuzamahanga cy'indege cya Goma kimeze kugira ngo kibe cyakongera gufungurwa.

Itangazo ry'impande zombi rinavuga ko "SADC izafasha mu gusana ikibuga mpuzamahanga cy'indege cya Goma mu korohereza ingabo za SAMIDRC kuhava" ndetse ko izi mpande zemeranyije ku gahenge no guhagarika imirwano.