FARDC irashinja M23 'gusenya imihate y'amahoro' itera ibirindiro byabo

Inyandiko gusa
Umusirikare wa DR Congo

Ahavuye isanamu, AFP

Igisirikare cya DR Congo (FARDC) cyatangaje ko umutwe wa AFC/M23 urimo 'gusenya imihate y'amahoro yatangijwe n'amahanga' ukora ibitero bishya ku birindiro by'ingabo muri Kivu ya Ruguru na Kivu y'epfo.

Mu itangazo, umuvugizi w'igisirikare cya DR Congo Général Major Sylvain Ekenge avuga ko "ibitero biheruka" bya M23 byibasiye ibirindiro bya FARDC i Walikale muri Kivu ya Ruguru, no mu bice bya teritwari ya Walungu no mu misozi ya Minembwe muri teritwari ya Fizi muri Kivu y'Epfo.

Lt Col Willy Ngoma umuvugizi wa gisirikare wa M23 yabwiye BBC Gahuzamiryango ko ibivugwa na FARDC ari "ibinyoma".

Yagize ati: "Buri wese azi ubunyangamugayo bwa 'mouvement' yacu…ni bo bakomeza kurasa ibisasu ku birindiro byacu."

Ibi bibaye nyuma y'uko ku wa gatandatu no ku cyumweru gishize izi mpande zombi zisohoye amatangazo amenyesha guhagarika imirwano no kuva muri Walikale-centre kuri M23, ibyo itakoze ivuga ko FARDC yanze kuhavana 'drones' z'ibitero.

Izi mpande zihanganye zari zateye iyo ntambwe nyuma y'iminsi itatu Perezida Felix Tshisekedi na mugenzi we Paul Kagame w'u Rwanda bahuriye i Doha muri Qatar, ndetse n'imiryango y'ibihugu by'akarere yongereye imbaraga mu muhate wo kugera ku gahenge no gushaka umuti mu mahoro.

Ibice bigenzurwa na M23

Igisirikare cya Congo cyatangaje ko ibitero bishya bya M23 ku birindiro byabo "bisenya" iyo mihate, ariko ko "kugeza ubu gikomeje kwirinda ibikorwa byo gutera" kugira ngo bifashe M23 "kuvana byihuse" abarwanyi bayo muri Walikale, nk'uko babivuze mbere.

Kuri uyu wa kane tariki 27 Werurwe, huzuye amezi abiri umutwe wa M23 ufashe umujyi wa Goma, umurwa mukuru w'intara ya Kivu ya Ruguru, aho nyuma wakomeje ugafata na Bukavu, umurwa mukuru wa Kivu y'Epfo.

Ikibazo cy'intambara muri DR Congo none ku wa kane i New York kirongera kwigwaho mu nama y'Akanama gashinzwe umutekano ku isi ka ONU.

Leta ya Kinshasa, ONU, n'ibihugu bimwe by'iburengerazuba bishinja u Rwanda gufasha umutwe wa M23, ibyo leta y'u Rwanda mu bihe bya vuba itemeye cyangwa ngo ihakane yeruye.

Muri ako kanama biteganyijwe ko umukuru wa MONUSCO, Bintou Keita, atanga raporo y'uko ibintu byifashe mu burasirazuba bwa Congo. Harumvwa kandi uruhande z'u Rwanda, ndetse na Angola iherutse guhagarika umurimo yari yarashinzwe w'ubuhuza muri iki kibazo.