Inteko y'u Rwanda yashinje iya EU 'kwivanga mu bucamanza' mu gusaba ko Victoire Ingabire arekurwa

Inteko ishingamategeko y'u Rwanda "yamaganye ikomeje" umwanzuro w'inteko ishingamategeko y'umuryango w'Ubumwe bw'Uburayi (EU) usaba irekurwa ry'umunyapolitike utavuga rumwe n'ubutegetsi bw'u Rwanda Victoire Ingabire, ivuga ko ari "ukwivanga mu mikorere y'ubucamanza".

Mu mwanzuro wafashwe n'imitwe yombi – uw'abadepite n'uwa sena – yateranye, inteko ishingamategeko y'u Rwanda yavuze ko ibyo "binyuranye n'amahame ahuriweho y'ubwigenge bw'ubucamanza n'aya demokarasi".

Mu mwanzuro wo ku itariki ya 11 y'uku kwezi kwa Nzeri (9), inteko ishingamategeko ya EU yasabye ko Ingabire arekurwa "aka kanya nta yandi mananiza", hamwe n'abandi batavuga rumwe n'ubutegetsi ivuga ko bazira gukoresha mu mahoro uburenganzira bw'ibanze bwabo, inasaba ko "ibirego bishingiye ku mpamvu za politike bikurwaho".

Ingabire, umukuru w'ishyaka DALFA–Umurinzi ritarandikwa mu Rwanda, yatawe muri yombi ku itariki ya 19 Kamena (6) uyu mwaka n'urwego rw'ubugenzacyaha mu Rwanda (RIB).

Hari nyuma yuko ubushinjacyaha busabye RIB kumukoraho iperereza "mu rwego rwo gushyira mu bikorwa icyemezo cy'Urukiko Rukuru", nkuko RIB yabitangaje, "kugira ngo ashyikirizwe Urukiko" rutanyuzwe n'amakuru yatanze ku bayoboke be bamaze igihe baburana ku birego byo gushaka guhirika ubutegetsi.

Ingabire aregwa ibyaha bitandatu birimo icyo kuba mu mutwe ugambiriye guhirika ubutegetsi, we arabihakana.

Inteko ishingamategeko y'u Rwanda ivuga ko umwanzuro w'inteko ya EU ushingiye "ku makuru abogamye, adashingiye ku mategeko, agorekwa n'abanyapolitiki bafitiye urwango u Rwanda n'ubuyobozi bwarwo, bagamije gutesha agaciro ubwigenge, inzego zubakiye ku ihame rya demokarasi, iterambere, umwanya n'icyubahiro by'u Rwanda mu ruhando mpuzamahanga".

Yasabye ko habaho "iyubahirizwa ry'amahame y'ubwubahane, ubwizerane no kubazwa inshingano mu bufatanye bwose bw'iterambere", bityo igaya "ibangamirwa ry'ayo mahame mu mikorere y'Inteko Zishinga Amategeko".

Inteko ishingamategeko ya EU yibutsa ko Ingabire yanatawe muri yombi mbere mu 2010, agakatirwa gufungwa imyaka 15, nyuma y'"urubanza rubera [rubogamye]", nkuko ibivuga, akaza kurekurwa muri Nzeri (9) mu mwaka wa 2018 ku mbabazi za Perezida w'u Rwanda Paul Kagame.

Inteko ya EU yibutsa kandi ko mu 2017 urukiko rw'Afurika ku burenganzira bwa muntu n'ubw'abaturage (AfCHPR) rwanzuye ko leta y'u Rwanda yahonyoye ubwisanzure bwa Ingabire ku kuvuga icyo atekereza n'uburenganzira ku kuburanishwa mu rubanza rutabera.

Uretse gusaba ifungurwa rya Ingabire, inteko ishingamategeko ya EU yanasabye u Rwanda kwemera guha uruhushya rwo kumwunganira itsinda ry'abanyamategeko yihitiyemo, inasaba ko rwemera umwanzuro w'urukiko rwa AfCHPR, rwategetse mu 2019 ko Ingabire ahabwa indishyi.

Inteko ya EU yanasabye ko abategetsi b'u Rwanda bareka gutoteza no gufunga nta mpamvu abatavuga rumwe n'ubutegetsi, abanyamakuru n'abo mu miryango itari iya leta, no gutuma habaho ubwisanzure bw'itangazamakuru n'urubuga rwo kujya impaka muri politike no kugira uruhare muri demokarasi, harimo n'"amatora yo mu bwisanzure no mu mucyo".

Yasabye ko komisiyo y'uwo muryango "isuzuma ubufasha bw'amafaranga busanzweho n'ubundi bufasha... ku nzego za leta y'u Rwanda zigira uruhare mu gufunga nta mpamvu, iyicarubozo cyangwa imanza zibera".

Inteko ishingamategeko y'u Rwanda ishimangira ko "u Rwanda ari Leta yigenga, ifite ubusugire, demokarasi kandi igendera ku mategeko nk'uko biteganywa n'Itegeko Nshinga n'andi mategeko".

Yongeraho ko ubu Ingabire "ari mu butabera kubera ko hari ibindi byaha akekwaho".

Ingabire aregwa ibirego bimwe n'iby'itsinda ry'abantu icyenda bivugwa ko bari abayoboke b'ishyaka rye DALFA–Umurinzi.

Yatawe muri yombi abandi bamaze imyaka isaga ine bafunze, ubushinjacyaha bukavuga ko imvugo za bamwe ari zo zatumye akurikiranwa.

Ingabire ahakana ibyaha aregwa, akavuga ko bimwe mu byo aregwa byashaje bitagikurikiranwa mu rwego rw'amategeko, na ho ibindi ngo akaba yari yarigeze kubibazwa mu bihe byashize ntihagire inkurikizi ibaho.