Impamvu ebyiri zituma Victoire Ingabire asaba gukurikiranwa adafunzwe

Umunyapolitiki utavuga rumwe n'ubutegetsi mu Rwanda Victoire Ingabire arasaba urukiko rw'ibanze rwa Kicukiro kumurekura kuko asanga afunzwe binyuranyije n'amategeko.

Ingabire yatanze ikirego avuga ko iminsi 30 y'igifungo cy'agateganyo yakatiwe yarangiye akagumishwa muri gereza kandi ubushinjacyaha butarasabye ko iyo minsi yongerwa cyangwa ngo bumuregere urukiko ruzamuburanisha mu mizi.

Yafunzwe tariki 19 Kamena (6) uyu mwaka.

Ubushinjacyaha bwo buvuga ko ikirego cya Ingabire kidafite ishingiro kuko bwaregeye urukiko ruzaburanisha mu mizi urubanza rwa Ingabire kandi ko byakorewe ku gihe.

Ingabire aregwa ibyaha bitandatu birimo icyo kuba mu mutwe ugambiriye guhirika ubutegetsi, we akaba abihakana.

Mu rukiko Victoire Ingabire yagaragaye muri wa mwambaro w'iroza ari kumwe n'umunyamategeko we Gatera Gashabana.

Nk'uko bisanzwe, abapolisi n'abacungagereza bari benshi mu mbuga, abandi bazengurutse inyubako y'urukiko.

Umunyamategeko Gashabana, watanze ikirego, yavuze ko asanga uwo yunganira afunzwe binyuranyije n'amategeko.

Gashabana avuga ko iminsi 30 y'igifungo cy'agateganyo yarangiranye n'itariki ya 17 y'uku kwezi kwa munani.

Avuga ko umukiliya we yagumishijwe muri gereza nyamara nta busabe bwo kongera iki gifungo ubushinjacyaha bwagejeje ku rukiko kandi bukaba bwari butaramuregera urukiko ngo aburanishwe mu mizi.

Kuri Gashabana, ngo kuba ibi byombi bitarakozwe hagombaga gukurikiraho irekurwa rya Ingabire nta kindi kibaye.

Ariko abahagarariye ubushinjacyaha buregwa, bo basanga Gashabana yigiza nkana kuko umunsi wa 30 wuzuye ari ku cyumweru kandi nta mirimo ya leta ikorwa mu minsi yagenewe ikiruhuko.

Bavuga ko batanze ikirego bukeye bwaho kuko babyemererwa n'itegeko, bakavuga ko iki kirego gikwiye guteshwa agaciro.

Ariko Gashabana ndetse n'uwo yunganira ntibanyuzwe n'ibi bisobanuro.

Bavuga ko ifungwa ry'agateganyo ari icyemezo gifatwa mu buryo budasanzwe, ko iminsi yategetswe y'iki gifungo igomba kubarwa hatitawe ku minsi, yaba iy'akazi cyangwa se iy'ikiruhuko.

Ubwo impaka zasaga n'izirangiye, Ingabire yazamuye akaboko asaba urukiko ko yifuza gukurikiranwa adafunzwe ku mpamvu afite, agategekwa ibyo agomba kubahiriza.

Ingabire yavuze ko afite umugabo urwaye cyane kandi yagombye kuba hafi.

Gusa ngo inshuro nyinshi yagerageje gusaba uruhushya rwo kuva mu gihugu ngo ajye kumureba ntiyabyemerewe.

Muri gereza imufunze na ho ngo yakomeje gusaba kwemererwa kuvugana n'umugabo we ariko ntabyemererwe.

Ingabire avuga ko icyaba cyiza ari uko yamurwaza amuri hafi ariko mu gihe bitemewe nibura agahabwa uburenganzira bwo kumukurikirana kuri telefone.

Uru rubanza rwamaze igihe gitoya rwahise rusozwa, umucamanza avuga ko azatangaza icyemezo cy'urukiko ku itariki ya 28 z'uku kwezi.

Ingabire aregwa ibirego bimwe n'iby'itsinda ry'abantu 9 bivugwa ko bari abayoboke b'ishyaka rye DALFA - Umurinzi, ritarandikwa n'ubutegetsi.

Yatawe muri yombi abandi bamaze imyaka isaga ine bafunze, ubushinjacyaha bukavuga ko imvugo za bamwe ari zo zatumye akurikiranwa.

Ingabire ahakana ibyaha, akavuga ko bimwe mu byo aregwa byashaje bitagikurikiranwa mu rwego rw'amategeko, na ho ibindi ngo akaba yari yarigeze kubibazwa mu bihe byashize ntihagire inkurikizi ibaho.