Ballon d'Or: Bwa mbere Karim Benzema atsindiye igihembo cy'umukinnyi warushije abandi ku isi mu mupira w'amaguru

Rutahizamu wa Real Madrid n'uw'ikipe y'igihugu y'Ubufaransa Karim Benzema yatsindiye umupira wa zahabu (Ballon d'Or) - uhembwa umukinnyi warushije abandi bose ku isi mu mupira w'amaguru mu mwaka - ku nshuro ya mbere.

Benzema yatsinze ibitego 44 mu mikino 46 ubwo yafashaga Real gutsindira igikombe cya Champions League n'icya shampiyona ya Espagne - La Liga - mu mwaka w'imikino wa 2021-2022.

Lionel Messi (wabaye uwa karindwi) na Cristiano Ronaldo (wabaye uwa gatanu) bari baratsindiye iki gihembo inshuro 12 mu nshuro 13 zabanje.

Rutahizamu Sadio Mané wa Bayern Munich na Sénégal, wari muri Liverpool mu mwaka wa 2021-2022, yabaye uwa kabiri imbere y'umukinnyi wo hagati wa Manchester City, Kevin de Bruyne, waje ku mwanya wa gatatu.

Umukinnyi wo hagati wa Barcelona y'abagore, Alexia Putellas, yagumanye Ballon d'Or yo mu rwego rw'abagore, yahembwe umukinnyi warushije abandi bose ku isi mu mwaka wa 2022 mu mupira w'amaguru w'abagore.

Rutahizamu Beth Mead w'ikipe y'igihugu y'abagore y'Ubwongereza, wayifashije kwegukana Euro 2022, akaba ari na rutahizamu wa Arsenal, yaje ku mwanya wa kabiri.

Umunyezamu Thibaut Courtois wa Real Madrid n'ikipe y'igihugu y'Ububiligi yahembwe nk'umunyezamu warushije abandi bose ku isi mu mwaka wa 2021-2022.

Manchester City yegukanye igikombe cya Premier League, yari ifite abakinnyi batandatu mu bahatanira igihembo muri uwo muhango wabereye i Paris mu Bufaransa mu ijoro ryo ku wa mbere, yahembwe nk'ikipe y'uyu mwaka ku isi, imbere ya Liverpool.

Ballon d'Or ihembwa umukinnyi warushije abandi bose ku isi mu mupira w'amaguru, iyi ikaba yatanzwe hagendewe ku mwaka w'imikino wa 2021-2022.

Umufaransa wa mbere utsindiye iki gihembo kuva mu 1998

Benzema ni we Mufaransa wa mbere utsindiye iki gihembo kuva Zinedine Zidane yagitsindira mu mwaka wa 1998.

Zidane yari muri uyu muhango, ashyikiriza iki gihembo uyu Mufaransa mugenzi we.

Benzema yagize ati: "Iki gihembo kiri imbere yanjye kinteye ishema rwose.

"Nkiri muto, zari inzozi zanjye zo mu bwana, sinigeze na rimwe ncika intege. Buri kintu cyose kirashoboka.

"Ntewe ishema rwose n'urugendo rwanjye rwo kugeza hano. Ntirwari rworoshye, cyari igihe kigoye no ku muryango wanjye".

Benzema ni we wahabwaga amahirwe menshi yo gutsindira iki gihembo muri uyu mwaka.

Ibitego 44 yatsinze birimo bitatu yatsinze mu minota 17 yo mu gice cya kabiri Real ikina na Paris Saint-Germain muri Champions League, n'ibindi bitatu yatsinze kwa Chelsea mu mukino ubanza wa kimwe cya kane cya Champions League.

Yanatsinze ibindi bitego bitatu mu mukino ubanza n'uwo kwishyura yose hamwe muri kimwe cya kabiri cya Champions League, ubwo Real yakinaga na Manchester City.

Uyu mukinnyi w'imyaka 34, ukinira Real Madrid kuva mu mwaka wa 2009, yitezwe kugira uruhare rukomeye mu ikipe y'Ubufaransa mu mikino y'igikombe cy'isi izakinirwa muri Qatar guhera ku itariki ya 20 y'ukwezi kwa cumi na kumwe uyu mwaka.

Igihembo cya Ballon d'Or gitorerwa n'abanyamakuru 100 bo mu bice bitandukanye byo ku isi.