Champions League: Real Madrid igikombe ca 14, Liverpool mu marushwa
Ivyizigiro vya Liverpool vyo gutsindira igikombe kigira indwi co mw'ihiganwa rihuza imirwi yabaye iya mbere I Bulaya (Champions League) birangiye mu mubabaro aho iguye mu minwe ya Real Madrid i Paris.
Umusatirizi wa Brezili Vinicius Jr, niwe ayihumiye, mu kwinjiza igitsindo kimwe rudende mu rukino rwose, aho yari yiketswe ko yoba yari yaraririye, Trent Alexander-Arnold akaba ari we yatumye ahagarara neza, bituma Real Madrid itahukana iki gikombe kigize 14, aho nyene niyo iherutse gutsindira ihiganwa rya Espagne, La Liga.
Liverpool yaronse amahirwe menshi yo gutsinda ariko umunyegori Thibaut Courtois yari yariye amavubi, uyu yahoze asamira Chelsea akaba yabanje gukurayo umupira wari utewe na Sadio Mane, imbere yo gukurayo uwundi mupira ukomeye wari utewe mw'igori na Mohamed Salah.
Ahavuye isanamu, PA Media
Mohamed Salah, yateshejwe iki gitsindo mu gihe yarondera kwihora ivyo yabonye mu rukino nk'uru nyene rwo mu 2018 na Real Madrid nyene, aho vyabaye ngombwa ko ava mu kibuga mu gice ca mbere kubera imvune.
Ahavuye isanamu, Reuters
Uru rukino rwategerezwa gutangura isaha imwe z'ijoro mu masaha mpuzamakungu (ni ukuvuga isaha zitatu z'ijoro mu masaha y'Uburundi n'Urwanda) rwatanguye rucerewe iminota 36 yose, kubera "ibibazo vy'umutekano" inyuma y'aho hari amasanamu asohote yerekana isinzi ry'abantu hanze y'ikibuga bariko bagerageza kwinjira mu kibuga ca Stade de France.
Gutsindwa kwa Liverpool gutumye uyu murwi warondera gukora ibidasanzwe mu mupira w'amaguru mu gutahukana ibikombe bine muri uno mwaka w'inkino urangiye, utahira bibiri gusa, ica FA (FA Cup) hamwe n'ica Carabao (Carabao Cup).
