Urupfu rwa Chérubin Okende: DR Congo igiye gukorana n'amahanga mu iperereza

Leta ya Repubulika ya Demokarasi ya Congo ivuga ko iperereza ry'ibanze rya polisi ryatangiye ku rupfu rwa Chérubin Okende, wari depite n'umuvugizi w'ishyaka ritavuga rumwe n'ubutegetsi, kandi ko hazaba n'iperereza rigari ririmo n'ibihugu by'inshuti.

Umurambo wa Okende, wo mu ishyaka Ensemble pour la République riyobowe na Moïse Katumbi, ku wa kane mu gitondo bawusanze mu modoka ye mu murwa mukuru Kinshasa ahitwa Limete.

Hari nyuma yuko ku wa gatatu ishyaka rye ritangaje ko yashimuswe n'abitwaje intwaro.

Katumbi yihanganishije umupfakazi we n'abana be, avuga ko hagomba gukorwa iperereza ryigenga ku iyicwa rya Okende kugira ngo habeho umucyo ku cyateye iki "gisa n'icyaha cya Leta".

Ku mugoroba wo ku wa kane, Minisitiri w'intebe wa DR Congo Jean-Michel Sama Lukonde yakoranye inama yihutirwa n'inzego zishinzwe umutekano biga ku rupfu rwa Okende.

Mu kiganiro n'abanyamakuru, umuvugizi wa leta ya Congo Patrick Muyaya yagize ati: "Hari iperereza ry'ibanze ryamaze gutangira rya polisi y'igihugu.

"Ariko muri iyo nama byemeranyijweho ko hazabaho akanama k'iperereza kagutse cyane, kazabamo inzego zose [z'umutekano].

"Twemeranyijwe ko muri iryo perereza tuzanazanamo inzego zo mu mahanga z'ibihugu by'inshuti kugira ngo mu mucyo wose kandi mu buryo bwihuse cyane dushobore gutanga umucyo kuri iki cyaha kibi cyane..."

Muyaya yavuze ko iyicwa rya Okende ribaye mu gihe inzego zishinzwe umutekano za Congo zari zisanzwe ziri maso kuko hari igisa nko gutera ubwoba mu baturage, binyuze mu bikorwa birimo nko gushimuta abantu, avuga ko leta igiye gukaza ingamba z'umutekano.

Yavuze ko ibi bibaye kandi mu gihe iki gihugu cyitegura kwakira imikino ihuza ibihugu bikoresha Igifaransa byo mu muryango wa Francophonie, izatangira ku itariki ya 28 y'uku kwezi, no mu gihe hitegurwa amatora ya perezida yo mu Kuboza (12) uyu mwaka.

Muyaya yavuze ko byaba ari "kare cyane" kuvuga ko urupfu rwa Okende, wari ufite imyaka 62, ari ubwicanyi bushingiye kuri politiki, nkuko bivugwa na bamwe mu batavuga rumwe n'ubutegetsi, avuga ko icyiza ari ugutegereza ibizava mu iperereza.

Ku wa kane, ibiro bya Perezida Félix Tshisekedi byatangaje ko "n'akababaro yamenye kubura mu buryo bubabaje" Chérubin Okende.

Okende yari Minisitiri wo gutwara abantu n'ibintu yegura mu Kuboza (12) umwaka ushize, ubu yari umudepite akaba n'umuvugizi w'ishyaka Ensemble pour la République.

Amafoto yagaragajwe ku mbuga nkoranyambaga yerekana umurambo uriho amaraso menshi w'umugabo wicaye mu modoka yambaye ishati y'umweru, BBC ntiyashoboye kugenzura byigenga aya mafoto.

Mbere yuko urupfu rwe rumenyekana, ishyaka rye ryatangaje ko yashimuswe ku wa gatatu nimugoroba n'abagabo bitwaje intwaro batamenyekanye.

Ishyaka rye ryavuze ko Okende yashimutiwe muri 'parking' y'urukiko rurengera itegekonshinga ku wa gatatu saa cyenda (15h).

Ikinyamakuru Jeune Afrique kivuga ko ageze ku rukiko Okende yohereje umurinzi we (garde du corps/body guard) imbere mu rukiko gutanga ibaruwa ye, uyu yagaruka agasanga shebuja yabuze.

Ishyaka rye ryongeraho riti: "Igihugu cyacu kirarushaho kumera nabi".