Umukuru w'inyeshyamba Ahmed al-Sharaa yabwiye BBC ko Syria nta nkeke iteje ku isi

Ahmed al-Sharaa, umutegetsi nyakuri wa Syria, yavuze ko iki gihugu kinaniwe cyane kubera intambara kandi ko nta nkeke giteje ku baturanyi bacyo cyangwa ku burengerazuba bw'isi (Uburayi n'Amerika).

Mu kiganiro yagiranye na BBC mu murwa mukuru Damascus, yasabye ko ibihano Syria yafatiwe bikurwaho.

Yagize ati: "Ubu, nyuma y'ibyabaye byose, ibihano bigomba kuvanwaho kuko byari bigambiriye ubutegetsi bwa kera. Uwari ukandamijwe n'uwari umukandamije ntibakwiye gufatwa kimwe."

Sharaa yayoboye igitero cyihuse cyahiritse ubutegetsi bwa Bashar al-Assad mu byumweru bitageze kuri bibiri bishize.

Ni umukuru w'umutwe wa Hayat Tahrir al-Sham (HTS), ufite ubwiganze (ijambo rikomeye) mu ihuriro ry'imitwe y'inyeshyamba iri ku butegetsi, ndetse mbere yari azwi ku izina rye ryo mu ntambara rya Abu Mohammed al-Jolani.

Yavuze ko umutwe wa HTS ukwiye gukurwa ku rutonde rw'imitwe y'iterabwoba.

Umuryango w'Abibumbye (ONU), Amerika, umuryango w'Ubumwe bw'Uburayi (EU) n'Ubwongereza, n'ibindi bihugu byinshi, biwufata nk'umutwe w'iterabwoba, kuko watangiye nk'uwashibutse ku mutwe wa al-Qaeda. Witandukanyije na al-Qaeda mu mwaka wa 2016.

Sharaa yavuze ko HTS atari umutwe w'iterabwoba.

Yavuze ko utibasira abasivile cyangwa uturere dutuwe n'abasivile. Ahubwo yavuze ko abagize uwo mutwe bifata ubwabo nk'abakorewe ibyaha n'ubutegetsi bwa Assad.

Yahakanye avuga ko adashaka guhindura Syria ngo ijye kumera nka Afghanistan.

Sharaa yavuze ko ibyo bihugu bitandukanye cyane ndetse ko bifite imigenzo itandukanye. Yavuze ko Afghanistan ari igihugu gishingiye ku moko. Yavuze ko muri Syria hari imitekerereze itandukanye.

Yavuze ko yemera uburezi bw'abagore.

Akomoza ku ntara yo mu majyaruguru ashyira uburengerazuba bwa Syria yigaruriwe n'inyeshyamba kuva mu mwaka wa 2011, Sharaa yagize ati:

"Tumaze imyaka irenga umunani dufite za kaminuza muri Idlib."

"Ntekereza ko ijanisha ry'abagore muri za kaminuza rirenga 60%."

Abajijwe niba kunywa inzoga bizemerwa, Sharaa yagize ati: "Hari ibintu byinshi ntafite uburenganzira bwo kuvugaho kuko ari ibibazo byo mu rwego rw'amategeko."

Yongeyeho ko hazabaho "akanama k'Abanya-Syria b'inzobere mu mategeko bo kwandika itegekonshinga. Bazafata icyemezo. Ndetse umutegetsi uwo ari we wese cyangwa perezida azagomba gukurikiza amategeko".

Sharaa yari atuje muri iki kiganiro cyose, yambaye imyenda ya gisivile, ndetse agerageza kumara impungenge abo bose bemeza ko umutwe we utitandukanyije n'amateka yawo y'ubuhezanguni.

Abanya-Syria benshi ntibamwizera.

Ibikorwa by'abategetsi bashya ba Syria byo mu mezi macye ari imbere bizagaragaza uko bashaka ko Syria imera – n'uburyo bashaka kuyitegekamo.