Impanga z'iminsi ine ziciwe muri Gaza mu gihe se yari yagiye kuzandikisha ko zavutse

Abana b'impinja b'impanga (amahasa mu Kirundi) biciwe mu gitero cya Israel cyo mu kirere muri Gaza ubwo se yari ari ku biro by'ubutegetsi by'aho batuye yagiye kubandikisha ko bavutse.

Asser, umuhungu, na Ayssel, umukobwa, bari bamaze iminsi ine bavutse ubwo se Mohammed Abu al-Qumsan yajyaga gufata ibyemezo by'amavuko byabo.

Icyo gihe ubwo atari ari mu rugo, abaturanyi be bamuhamagaye bamubwira ko urugo rwe rwo mu mujyi wa Deir al Balah rwarashweho igisasu.

Icyo gitero cyanishe umugore we na nyirakuru w'izo mpanga.

Yagize ati: "Sinzi uko byagenze. Mbwirwa ko ari igisasu cyakubise inzu."

Yongeyeho ati: "Sinanabonye akanya ko kubishimira [ko bavutse]."

Minisiteri y'ubuzima ya Gaza igenzurwa na Hamas ivuga ko impinja 115 zavutse ubundi zikicwa muri iyi ntambara.

Ibiro ntaramakuru AP bitangaza ko uwo muryango wari wakurikije itegeko ryo guhunga ukava mu mujyi wa Gaza mu byumweru bibanza by'intambara ya Israel na Gaza, ushaka aho kwikinga mu gice kiri rwagati muri Gaza, nkuko igisirikare cya Israel cyabitegetse.

BBC yasabye igisirikare cya Israel kugira icyo kivuga kuri icyo gitero, kandi itegereje igisubizo.

Israel ivuga ko igerageza kwirinda kugirira nabi abasivile, ndetse yegeka impfu zabo ku kuba Hamas ikorera mu duce dutuwemo mu bucucike, no gukoresha inyubako za gisivile nk'ahantu ho kwikinga.

Ariko abategetsi ba Israel ni gacye bagira icyo bavuga ku gitero ukwacyo.

Ahantu nk'aho ho kwikinga muri Gaza hagiye hagabwaho ibitero mu byumweru bicye bishize.

Ku wa gatandatu, igitero cya Israel cyo mu kirere ku nyubako y'ishuri mu mujyi wa Gaza icumbikiye Abanye-Palestine bavuye mu byabo cyishe abantu barenga 70, nkuko umuyobozi w'ibitaro yabibwiye BBC.

Umuvugizi w'igisirikare cya Israel yavuze ko iryo shuri "ryakoraga nk'ikigo cya gisirikare gikorerwamo na Hamas na Islamic Jihad", ibyo Hamas yahakanye.

Israel yahakanye umubare w'abapfuye, ariko BBC ntiyashoboye kugenzura mu buryo bwigenga imibare itangwa na buri ruhande.

Abagabo bitwaje imbunda bayobowe na Hamas bishe abantu bagera ku 1,200 mu gitero muri Israel cyo ku itariki ya 7 Ukwakira (10) mu 2023, bashimuta abandi 251 babajyana muri Gaza.

Icyo gitero cyabaye imbarutso y'igitero cya gisirikare kinini cya Israel kuri Gaza, ndetse n'iyi ntambara ikomeje.

Abanye-Palestine barenga 39,790 bamaze kwicirwa muri icyo gikorwa cya Israel, nkuko bivugwa na minisiteri y'ubuzima ya Gaza igenzurwa na Hamas.