Afurika y'Epfo irasaba ICC gusohora urupapuro rwo guta muri yombi Netanyahu

Leta y'Afurika y'Epfo yasabye urukiko mpuzamahanga mpanabyaha (ICC/CPI) gusohora urupapuro rwo guta muri yombi Minisitiri w'intebe wa Israel Benjamin Netanyahu bitarenze hagati mu kwezi gutaha kw'Ukuboza (12).

Khumbudzo Ntshavheni, Minisitiri mu biro bya Perezida w'Afurika y'Epfo, yavuze ko ICC nitabikora, bizaba ari ikimenyetso cyo "kunanirwa kuzuye" kw'ubutegetsi bw'isi.

Yagize ati: "Isi ntishobora guhagarara gusa irebera."

Israel ivuga ko irimo kwirwanaho nyuma y'igitero cya Hamas cyo ku itariki ya 7 Ukwakira (10) uyu mwaka, cyiciwemo abantu 1,200 naho abandi barenga 200barashimutwa.

Israel yahamagaje ambasaderi wayo muri Afurika y'Epfo, Eliav Belotserkovsky, kugira ngo "bagirane ibiganiro", nkuko byatangajwe na minisiteri y'ububanyi n'amahanga ya Israel.

Ku rubuga X (rwahoze rwitwa Twitter), Lior Haiat, umuvugizi wa minisiteri y'ububanyi n'amahanga, yavuze ko ibyo bikurikiye "amatangazo mashya y'Afurika y'Epfo", ariko nta makuru arambuye yatanze.

Afurika y'Epfo imaze igihe inenga bikomeye igikorwa cya gisirikare cya Israel muri Gaza.

Israel ivuga ko irimo kugerageza kugabanya cyane umubare w'abasivile bapfa n'abakomereka, ariko Minisitiri Ntshavheni yavuze ko leta ya Israel irimo kugerageza "gukuraho Abanya-Palestine henshi muri Gaza no kuyigarurira".

Afurika y'Epfo, hamwe na Bangladesh, Bolivia, ibirwa bya Comores (Comoros) na Djibouti, byatanze ubusabe muri ICC bwuko ikora iperereza niba hari ibyaha byo mu ntambara n'ibyaha byibasira inyokomuntu byakozwe muri Gaza.

Afurika y'Epfo imaze igihe ishyigikiye cyane Abanya-Palestine.

Muri uku kwezi kw'Ugushyingo (11), Afurika y'Epfo yari yatangaje ko ikuye abadiplomate bayo muri Israel, ndetse yumvikanisha ko umwanya w'ambasaderi wa Israel muri Afurika y'Epfo urimo "kurushaho kugorana ku kuba wagumaho".

Hashize imyaka itanu nta ambasaderi Afurika y'Epfo ifite muri Israel.