Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
'Nta kujya muri NATO kwa Ukraine' – Trump witegura ibiganiro na Zelensky muri White House
- Umwanditsi, Jude Sheerin
- Igikorwa, BBC News i Washington
Perezida w'Amerika Donald Trump yavuze ko Perezida wa Ukraine ashobora kurangiza intambara "niba abishaka", ariko ko "nta kujya muri NATO [OTAN] kwa Ukraine" kuzabaho nka kimwe mu bigize amasezerano y'amahoro.
Trump yabivuze mu gihe habura amasaha ngo yakire Perezida wa Ukraine Volodymyr Zelensky mu biro bya perezida w'Amerika (White House). Trump yanavuze ko "nta gusubirana" umwigimbakirwa wa Crimea wo mu majyepfo ya Ukraine kuzabaho.
Uburusiya bwawiyometseho mu buryo bunyuranyije n'amategeko mu 2014, imyaka umunani mbere yuko bugaba igitero gisesuye kuri Ukraine.
Ayo magambo ya Trump akurikiye inama yagiranye na Perezida w'Uburusiya Vladimir Putin ku wa gatanu ushize muri leta ya Alaska muri Amerika, yavuyemo ko Perezida w'Amerika yaretse ubusabe bw'agahenge ahubwo agasaba ko habaho amasezerano y'amahoro ahoraho.
Nyuma yuko ageze muri Amerika mu ijoro ryo ku cyumweru, Zelensky yashimangiye ubusabe bwe ku nshuti za Ukraine bwo kuyizeza umutekano bya nyabyo.
Ku cyumweru, intumwa y'Amerika yavuze ko Putin yemeye ko hashobora kubaho amasezerano y'umutekano ameze nka OTAN (umuryango wo gutabarana w'Uburayi n'Amerika) kuri Ukraine.
Perezida w'Uburusiya yakomeje kwanga igitekerezo cyuko Ukraine yinjira muri OTAN.
Ku cyumweru, Trump yatangaje ku rubuga nkoranyambaga rwe Truth Social ati: "Perezida Zelenskyy wa Ukraine ashobora kurangiza intambara n'Uburusiya nk'aka kanya, niba abishaka, cyangwa ashobora gukomeza kurwana."
Trump yongeyeho ati: "Mwibuke uko byatangiye. Nta gusubirana Crimea yatanzwe na Obama (mu myaka 12 ishize, nta sasu rirashwe!), ndetse NTA KUJYA MURI NATO KWA UKRAINE. Ibintu bimwe ntibihinduka na rimwe!!!"
Mbere yuko Trump asubira ku butegetsi muri Mutarama (1) uyu mwaka, ibihugu byo muri OTAN byemeranyije "inzira idasubirwaho" yuko Ukraine yinjira muri uwo muryango.
Umunyamabanga mukuru wa OTAN Mark Rutte, hamwe n'abategetsi b'i Burayi barimo na Minisitiri w'intebe w'Ubwongereza Sir Keir Starmer, baraza kuba bari kumwe na Zelensky i Washington muri ibyo biganiro byo kuri uyu wa mbere byiga kuri ejo hazaza ha Ukraine.
Abandi baza kwitabira ibyo biganiro ni Perezida w'Ubufaransa Emmanuel Macron, Minisitiri w'intebe w'Ubutaliyani Giorgia Meloni, umutegetsi mukuru (Chancellor) w'Ubudage Friedrich Merz, Perezida wa Finland Alexander Stubb na Perezida wa komisiyo y'Uburayi Ursula von der Leyen. Muri abo bategetsi, ntibizwi abari bujye muri White House.
Nyuma Trump yongeyeho ati: "Umunsi ukomeye muri White House ejo [kuri uyu wa mbere]. Nta na rimwe mbere higeze haza abategetsi benshi cyane b'i Burayi icyarimwe. Ni icyubahiro cyinshi kuri jye kubakira!!!"
Zelensky yatangaje ku mbuga nkoranyambaga ko ashimira Trump ku bwo kumutumira. Ati: "Twese duhuriye ku gushaka cyane kurangiza iyi ntambara mu buryo bwihuse kandi bwizewe."
Yanashimangiye ko bicyenewe ko inshuti za Ukraine ziyizeza umutekano bya nyabyo, "bitari nko mu myaka ishize... igihe Ukraine yahabwaga ingirwa 'kwizezwa umutekano' mu 1994 ariko ntibigire icyo bimara".
Yongeyeho ati: "Birumvikana, Crimea ntiyagakwiye kuba yaratanzwe icyo gihe. Cyo kimwe n'uko Abanya-Ukraine batatanze [umurwa mukuru] Kyiv, Odesa, cyangwa Kharkiv nyuma ya 2022."
