Ukraine: Uburusiya bwemeye ko ibintu 'bikomeye' muri Kherson iri kuraswaho

Laurence Peter

BBC News

Umukuru w'abasirikare b'Uburusiya bari muri Ukraine avuga ko ibintu "bigoye" mu mujyi wa Kherson wo mu majyepfo kandi ko abahatuye bagiye guhungishwa.

Jenerali Sergei Surovikin yavuze ko abasirikare ba Ukraine bakoresha rokete zo mu bwoko bwa HIMARS (High Mobility Artillery Rocket System) barimo kurasa ku bikorwa-remezo no ku nyubako. Yabivugiye kuri televiziyo ya leta y'Uburusiya.

Yagize ati: "Igisirikare cy'Uburusiya hejuru y'ibindi bintu byose kizatuma habaho guhungisha mu mutekano abaturage" ba Kherson.

Uku kwemera kudakunze kubaho ko abasirikare b'Uburusiya bugarijwe n'ibibazo bikomeye, kwanavuzweho n'umutegetsi wo ku rwego rwo hejuru w'i Kherson.

Kirill Stremousov, umutegetsi wo muri ako karere washyizweho n'Uburusiya, yaburiye abatuye i Kherson ko "vuba aha cyane" abasirikare ba Ukraine bazagaba igitero kuri uyu mujyi.

Ku rubuga rw'ubutumwa rwa Telegram, yagize ati: "Nyabuneka mwumve ko ibi ndimo kubivuga nkomeje - ndimo kuvuga guhunga vuba cyane hashoboka".

Yongeyeho ko abantu bo ku nkombe yo mu burengerazuba bw'umugezi wa Dnieper (witwa Dnipro muri Ukraine) ari bo bari mu byago cyane kurusha abandi.

Ibi byemejwe na Guverineri w'ako karere, Vladimir Saldo, na we washyizweho n'Uburusiya, mu butumwa yatangaje mu buryo bwa videwo.

Yavuze ko imijyi ine iri ku nkombe yo mu burengerazuba cyangwa hafi y'iyo nkombe, abasivile bayituye bazahungishwa mu cyo yise "kubimura mu buryo buteguye, bwo mu byiciro".

Kherson yabaye umujyi wa mbere ukomeye wigaruriwe n'Abarusiya, mu kwezi kwa kabiri.

Mu byumweru bya vuba aha bishize, abasirikare ba Ukraine bagiye bakomeza kwisubiza ubutaka buwegereye. Baratsinsuye bagera mu ntera ya kilometero 30 mu majyepfo ahakikije umugezi wa Dnieper, bateza inkeke yo guta mu mutego (kugota) abasirikare b'Uburusiya.

Jenerali Surovikin yagize ati: "Muri rusange uko ibintu bimeze mu karere k'igikorwa cya gisirikare cyihariye bishobora gusobanurwa ko bikomeye".

Kherson ni wo murwa mukuru w'akarere wonyine wa Ukraine wafashwe n'Abarusiya mu gitero cyabo.

Ubu noneho ibiro bya perezida w'Uburusiya - Kremlin - bivuga ko Kherson n'utundi turere dutatu twa Ukraine ari utw'Uburusiya - ibyo amahanga yamaganye.

Kwangirika kw'ibikorwa-remezo

Jenerali Surovikin, uzwiho gukoresha uburyo bukaze, yavuze ko gucunshumurira rokete muri Kherson kwa Ukraine kwangije iteme rya Antonivsky n'urugomero rw'amashanyarazi rwa Kakhovka, bituma urujya n'uruza ruhagarara aha hantu h'ingenzi.

Yavuze ko ibyo byateje ibibazo mu gutanga serivisi z'ingenzi, nko kuhageza ibiribwa, amazi n'amashanyarazi.

BBC ntiyashoboye kugenzura ikigero cy'ukuntu ibintu bimeze nabi muri Kherson.

Yanavuze ko abasirikare ba Ukraine barimo gukomeza kugaba ibitero ahantu hanini - mu duce twa Kupiansk na Lyman mu burasirazuba, no mu majyepfo i Mykolaiv n'i Krivyi Rih.

Kuri uyu wa gatatu, Saldo yavuze ko uko guhungisha kuzakorerwa abasivile bari hagati ya 50,000 na 60,000 mu gihe cy'iminsi itandatu, nkuko byatangajwe n'ibiro ntaramakuru TASS bya leta y'Uburusiya.

Mu gihe Uburusiya bwahatira abantu kuva mu ngo zabo, bishobora kuba icyaha cyo mu ntambara, hashingiwe ku gisobanuro gitangwa n'umuryango w'abibumbye (ONU/UN).

Mu kwezi kwa gatatu uyu mwaka, Ukraine yavuze ko Uburusiya bwohereje mu buryo bunyuranyije n'amategeko abantu babarirwa mu bihumbi ku butaka bwabwo bubakuye i Mariupol, umujyi wo muri Ukraine washegeshwe n'ibisasu by'Uburusiya.

Mu gisobanuro cya ONU cy'ibyaha byo mu ntambara, harimo: "Kwimura, mu buryo butaziguye cyangwa buziguye, gukozwe n'abafashe ahantu kwa bamwe mu baturage bwite babo b'abasivile berekezwa ku butaka bafashe [bagenzura], cyangwa kwirukana cyangwa kwimura abaturage bose cyangwa bamwe muri bo ku butaka bwafashwe".

Ku wa kabiri, Duma, cyangwa inteko ishingamategeko y'Uburusiya umutwe w'abadepite, yize kuri gahunda yo kwimura abatuye i Kherson bakerekezwa mu Burusiya.

Minisitiri w'intebe wungirije w'Uburusiya, Marat Khusnullin, yavuze ko bazahabwa inzu zo kubamo ahantu aho ari ho hose mu Burusiya, kandi ko leta izabaha ubufasha bw'amafaranga.

Televiziyo Vremya TV yo mu Burusiya yatangaje ko buri muntu mu bagize umuryango azahabwa ama-rouble 100,000 (arenga 1,700,500Frw) yo gusimbuza ibyo mu nzu byabaye ngombwa ko bata (basiga).

Mbere y'intambara, Kherson yari ituwe n'abaturage bagera hafi ku 300,000, ariko abategetsi bo muri Ukraine bagereranya ko hafi kimwe cya kabiri cy'uwo mubare (hafi 150,000) bahunze uwo mujyi.

Jenerali Surovikin ni we mukuru mushya w'intambara y'Uburusiya muri Ukraine - Kremlin iyita "igikorwa cya gisirikare cyihariye".

Yarwanye mu ntambara zitandukanye z'Uburusiya. Muri Syria, yayoboye ibikorwa by'igisirikare cy'Uburusiya byo kumisha ibisasu byishe abasivile benshi. Yanayoboye abasirikare muri Chechnya bashinjwe ibikorwa byo guhonyora uburenganzira bwa muntu.

Jenerali Surovikin yabivuze ku munsi Uburusiya bwagabyeho ibindi bitero by'indege ntoya zitarimo umupilote (drone) n'ibya misile ku murwa mukuru Kyiv no ku yindi mijyi imwe yo muri Ukraine, byinshi muri byo byibasiye ibikorwa-remezo by'amashanyarazi bya Ukraine.

Ibice bimwe bya Kyiv ubu nta mashanyarazi n'amazi yo mu nzu bifite.

Perezida wa Ukraine Volodymyr Zelensky yavuze ko 30% bya stasiyo z'amashanyarazi z'iki gihugu zashenywe mu minsi umunani ishize.