Uburusiya bwatoye itegeko ry''Igisubizo kuri Blinken' ku icengezamatwara ry'aba LGBT

Jasmine Andersson

BBC News

Inteko ishingamategeko y'Uburusiya, umutwe w'abadepite, yatoye nta n'umwe uvuyemo, ishyigikira kwagura itegeko ribuza icyiswe "icengezamatwara ry'abahuza ibitsina b'igitsina kimwe".

Muri iri tegeko ryavuguruwe, kwamamaza guhuza ibitsina kw'ab'igitsina kimwe uko ari ko kose – harimo nko mu bitabo, muri za filime no ku mbuga za internet – ntikwemewe n'amategeko kandi guhanishwa ibihano biremereye.

Ryahimbwe itegeko ry'"Igisubizo kuri Blinken", nyuma yuko Minisitiri w'ububanyi n'amahanga w'Amerika Antony Blinken arinenze avuga ko ari "uguhungabanya uburenganzira bwo kuvuga icyo umuntu atekereza".

Impirimbanyi zivuga ko uku ari ukundi kugerageza gukandamiza abakorana imibonano b'igitsina kimwe (LGBT) bo mu Burusiya.

Ryemejwe n'amajwi 397 kandi nta depite n'umwe muri Duma – ni ko inteko ishingamategeko y'Uburusiya, umutwe w'abadepite, yitwa – utaritoye, ndetse nta wifashe.

Uyu mushinga w'itegeko uracyacyeneye kwemezwa na sena y'Uburusiya no gushyirwaho umukono na Perezida w'Uburusiya Vladimir Putin, ariko ibi bibonwa ahanini nkaho ari umuhango wo gukurikiza gusa.

Iri tegeko ritavugwaho rumwe ryo kurwanya icyiswe "icengezamatwara ry'abahuza ibitsina b'igitsina kimwe", ryatowe bwa mbere mu mwaka wa 2013, ribuza mu bana "icengezamatwara ku mibonano mpuzabitsina itari kamere" – igisobanuro riha imibonano y'ab'igitsina kimwe.

Rishyira mu gatebo kamwe kuvuga mu buryo bwiza mu bitangazamakuru cyangwa kwamamaza imibonano y'ab'igitsina kimwe no gukwirakwiza amashusho y'imibonano mpuzabitsina, gushishikariza gukora urugomo, no guhembera ubushyamirane bushingiye ku irondaruhu, ivanguramoko no ku myemerere y'idini.

Kwamamaza, ibitabo na filime zivuga mu buryo bwiza aba LGBT bizabuzwa n'iri tegeko.

Ibi bituma habaho kugira impungenge kw'inzu zitangaza ibitabo, zaburiye ko iryo tegeko rishobora kugira ingaruka ku buvanganzo (literature) bwo mu gihe cyo ha mbere bw'Uburusiya.

Ibiganiro ibyo ari byo byose byo kuri internet bivuga ku ngingo z'aba LGBT bishobora guhagarikwa, ndetse no gucuruza ibicuruzwa biriho amagambo y'aba LGBT cyangwa ibirango byabo, na byo bizabuzwa n'iryo tegeko.

Umuntu uwo ari we wese uzarenga kuri iri tegeko azacibwa amande agera ku ma rubles 400,000, angana na miliyoni 7 uyavunje mu mafaranga y'u Rwanda.

Ni mu gihe za kompanyi zo zishobora gucibwa amande agera ku ma rubles miliyoni 5, angana na miliyoni 89Frw.

Abanyamahanga n'abadafite ubwenegihugu bafite ibyago byo gufungwa cyangwa kwirukanwa mu Burusiya mu gihe baba badakurikije iryo tegeko.

Impirimbanyi ziharanira uburenganzira bwa muntu n'imiryango y'aba LGBT bavuze ko uko kwagura iryo tegeko bisobanuye ko igikorwa icyo ari cyo cyose cyangwa kuvuga mu ruhame uko ari ko kose kw'aba LGBT birimo kugirwa icyaha gihanwa n'itegeko.

Kseniya Mikhailova, wo mu muryango ufasha aba LGBT ukorera mu Burusiya witwa Vykhod (bivuze "kumenyekanisha amahitamo y'umuntu ku mibonano"), yavuze ko itegeko rya mbere ryo mu myaka icyenda ishize ryabaye intandaro y'ibitero byibasira aba LGBT.

Yabwiye ibiro ntaramakuru Reuters ko ubu hagiye kubaho "tsunami [umutingito]" y'ubushotoranyi kuko iri vugurura ryakozwe urebye "rivuze ko leta itarwanya urugomo rukorerwa aba LGBT".

Ku wa kane, Minisitiri w'ububanyi n'amahanga w'Amerika Antony Blinken yashishikarije Uburusiya kureka uyu mushinga w'itegeko "no kubahiriza uburenganzira bwa muntu n'icyubahiro bya bose".

Umukuru wa Duma, Vyacheslav Volodin, mu nteko waryise "itegeko ry'Igisubizo kuri Blinken", we aribona ugutandukanye.

Yatangaje ko iryo tegeko rizarinda igihugu indangagaciro z'aba LGBT, yise "umwijima" ukwirakwizwa n'uburengerazuba (Uburayi n'Amerika).

Imvugo irwanya aba LGBT, Perezida Putin yayigize ishingiro rya gahunda ye ya politiki.

Mu ijambo aherutse kuvuga, yashinje uburengerazuba "kwerekeza kuri Satani [Shitani] mu buryo bweruye", atanga urugero rw'iyamamazwa i Burayi ry'uburenganzira bw'aba LGBT.