Amerika ivuga ko Hamas ifite ikigo cy'ubuyobozi munsi y'ibitaro byo muri Gaza

Amerika ivuga ko ifite amakuru y'ubutasi ko Hamas ifite ikigo cy'ubuyobozi munsi y'ibitaro bya Al-Shifa mu mujyi wa Gaza.

John Kirby, umuvugizi w'akanama k'umutekano w'igihugu k'Amerika, yavuze ko uwo mutwe wahabitse intwaro kandi ko wari witeguye igitero cya Israel.

Ubu ni bwo bwa mbere Amerika ishyigikiye mu buryo bwigenga ibivugwa n'inshuti yayo ikomeye Israel ko Hamas ikoresha ibitaro mu guhisha ibigo byayo. Hamas irabihakana.

Amerika yatangaje ibyo mu gihe Israel irimo kurushaho kotswa igitutu n'amahanga ngo irinde abasivile baheze mu bitaro.

Perezida w'Amerika Joe Biden yavuze ko ibitaro bya Al-Shifa "bigomba kurindwa" imirwano ikaze iri mu nkengero y'ibyo bitaro, ndetse Minisitiri w'intebe w'Ubwongereza Rishi Sunak yavuze ko Israel igomba gukora yubahiriza amategeko mpuzamahanga.

Agace ko mu nkengero ya Al-Shifa, ibitaro bya mbere binini byo muri Gaza, kahindutse izingiro ry'imirwano kuva mu minsi ya vuba aha ishize. Byemezwa ko abantu babarirwa mu bihumbi bikinze muri ibyo bitaro.

Kirby yavuze ko Amerika ifite amakuru yayo bwite y'ubutasi, yavuye mu masoko atandukanye, yumvikanisha ko Hamas na Islamic Jihad bakoresheje ibitaro byo muri Gaza n'imiyoboro yo munsi yabyo mu guhisha ibikorwa bya gisirikare no kuhafungira abashimuswe.

Mbere, ubutegetsi bw'Amerika bwari bwaratangaje gusa amakuru y'ubutasi yakusanyijwe akuwe ahantu ku karubanda (ashobora kugerwaho n'abandi bantu), ndetse ntibwari bwaremeje ko bufite amakuru yabwo bwite kuri ibi.

Kirby yagize ati: "Abagize Hamas n'umutwe w'Abanye-Palestine wa Islamic Jihad bafite ikigo cy'ubuyobozi n'ubugenzuzi kiri muri Al-Shifa mu mujyi wa Gaza.

"Bahabitse intwaro kandi biteguye gusubiza ku gikorwa cya gisirikare cya Israel kuri icyo kigo."

Kirby yavuze ko ibi bigaragaza ukuntu igikorwa cya Israel kigoye kuko "Hamas yicengeje cyane mu baturage b'abasivile".

Yagize ati: "Bisobanuke neza, ntidushyigikiye kurasa ibitaro n'indege, kandi ntidushaka kubona habaho imirwano mu bitaro aho abantu b'inzirakarengane, abantu batagira kirengera, abantu barwaye barimo kugerageza gusa kubona ubuvuzi bakwiye, atari ukwisanga mu mirwano. Ibitaro n'abarwayi bagomba kurindwa.

"Nkuko twabisobanuye neza inshuro nyinshi, ibikorwa bya Hamas ntibyoroshya inshingano ya Israel yo kurinda abasivile muri Gaza, kandi iki ni ikintu kigaragara tugiye kuganiraho na bagenzi bacu dushishikaye."

Ubwo yasubizaga kuri ayo magambo yatangajwe n'ibiro bya Perezida w'Amerika - White House - ku wa kabiri, mu itangazo yasohoye ryatangajweho inkuru n'ibiro ntaramakuru AFP, Hamas yavuze ko Israel izakoresha iryo suzuma ry'Amerika mu kwiha "uruhushya" rwo gukora "ubwicanyi bw'ubugome" ku bigo by'ubuvuzi, "isenye urwego rw'ubuvuzi rwa Gaza ndetse ikure Abanye-Palestine mu byabo".

Abaganga bari imbere mu bitaro bya Al-Shifa bavuga ko abantu babarirwa muri za mirongo, barimo n'impinja nibura eshatu zavutse imburagihe, bapfuye kubera ubucye bw'ibitoro, imiti n'umuriro w'amashanyarazi.

Babwiye BBC ko imirambo irenga 100 idashyinguye iri mu mbuga y'ibyo bitaro, kandi ko umuntu uwo ari we wese ugerageje kuva muri ibyo bitaro - cyangwa kuva mu nyubako imwe yabyo ajya mu yindi - aba ari mu byago by'urupfu kubera urugomo rurimo kubera muri ako gace.

Israel ishimangira ko itigeze irasa mu buryo butaziguye ku bitaro byo muri Gaza nubwo ivuga ko Hamas iri muri ibyo bitaro. Igisirikare cya Israel (IDF) cyasezeranyije gusenya Hamas muri Gaza. Ibihugu nk'Amerika, Ubwongereza n'Ubumwe bw'Uburayi bifata Hamas nk'umutwe w'iterabwoba.

Ku wa mbere, Israel yatangaje videwo ivuga ko igaragaza ubwihisho bwa Hamas bwo munsi y'ibitaro bya Rantisi bivurirwamo abana byo mu majyaruguru y'umujyi wa Gaza.

Muri iyo videwo imara iminota itandatu yiswe "videwo mbisi [y'umwimerere]", umuvugizi mukuru wa IDF, Rear Admiral Daniel Hagari, aboneka avuga ko ari ku muyoboro wo munsi y'ubutaka kuri metero 200 uvuye ku bitaro bya Rantisi.

Muri iyo videwo, Hagari atunga urutoki ku muryango w'uwo muyoboro wo munsi y'ubutaka, yemeza ko "ushamikiye" ku bitaro, n'insinga z'amashanyarazi avuga ko zigaragaza ko amashanyarazi akomoka ku zuba amaze igihe atanga umuriro w'amashanyarazi ku nzu yo mu kuzimu (bunker).

Nta kindi kimenyetso cyatanzwe ku kubaho kw'ikigo cy'ubuyobozi ariko umuvugizi wa IDF yavuze ko amaperereza akomeje.

Ayo mashusho agaragaza ibyo uwo muvugizi avuga ko ari ibyumba byo hasi biri imbere mu bitaro bya Rantisi. Atunga urutoki ku bubiko buhishe bw'intwaro, harimo n'imikandara iturika na za gerenade (grenades), hamwe na moto iriho icyo avuga ko ari ukwangirika kwatewe n'amasasu.

Rear Admiral Hagari avuga ko hari ibimenyetso ko abashimuswe na Hamas mu gitero cy'uwo mutwe muri Israel bari barafungiwe mu cyumba cyo hasi cy'aho.

Ishusho igaragaza intebe n'ibisa nk'ibiziriko, munsi y'ahakorerwa ubugenzuzi (control panel) handitse ngo "Ishami ry'Umuryango w'Abibumbye ryita ku buzima", tubisemuye mu Kinyarwanda, hamwe n'icupa ryo kwifashisha mu kugaburira umwana (rizwi nka 'biberon') rirambitseho hejuru.

Mu kindi cyumba, Hagari atunga urutoki ku kirangaminsi (calendrier) kiri ku rukuta kiriho iminsi mu Cyarabu kuva ku itariki ya 7 Ukwakira (10) - itariki Hamas yagabyeho igitero mu majyepfo ya Israel.

Rear Admiral Hagari avuga ko icyo kirangaminsi kigaragaza "ugusimburana ku kazi [shifts] kw'abaterabwoba", ubwo bari barinze icyo cyumba. Avuga ko amazina yari yanditse iruhande rw'amasaha y'akazi.

Igice cyo hejuru cy'iyi nyandiko kivuga kuri "al-Aqsa flood" - izina ry'ibanga Hamas yahaye ibitero byo ku itariki ya 7 Ukwakira. Ariko ayo magambo yo mu Cyarabu avuga iminsi y'icyumweru, aho kuba (gusobanura) amazina.

Atari muri iyo videwo, Hagari anavuga ko icyo cyumba gitatsemo za rido (rideaux) nk'ahantu hafatirwa za videwo. Muri za videwo zigaragaza abashimuswe zatangajwe na Hamas na Islamic Jihad, nta n'imwe muri izo videwo igaragaza ko inyuma hayo hasa n'aho muri icyo cyumba.

IDF yaherekeje irinze abanyamakuru ba CNN ibajyana aho hantu no ku bitaro, abari babirimo bahungishijwe ku wa gatanu. BBC News ntiyasuye aho hantu kandi ntishobora kugenzura mu buryo bwigenga buri kirego mu byavuzwe na Hagari.

Ariko minisiteri y'ubuzima muri Gaza igenzurwa na Hamas yasubije mu buryo burambuye ku bivugwa na Israel, ivuga ko ari "ikinamico iteye isoni".

Iyo minisiteri yavuze ko aho hantu ho munsi y'ubutaka hagaragajwe muri videwo hakoreshwaga nk'ahantu h'ubuyobozi n'ububiko, n'aho kwikinga ibitero by'indege.

Yavuze ko izo ntwaro zagaragajwe ari ibintu byapanzwe (byateguwe), inavuga ko muri Gaza hari za moto zibarirwa mu bihumbi zisa nk'iyo.

Iyo minisiteri ivuga ko abantu barenga 11,000 bamaze kwicwa mu bikorwa bya Israel kuri Hamas, kuva uwo mutwe wakwica abantu 1,200 muri Israel ku itariki ya 7 Ukwakira ndetse ugashimuta abandi hafi 240.

Andi makuru yo kuri iyi nkuru yatawe na Paul Brown wo mu ishami rya BBC Verify, rigenzura ukuri kw'amakuru.