Volodymyr Zelensky yabwiye inteko ishingamategeko y'Ubwongereza ko ubwisanzure buzatsinda

Perezida wa Ukraine Volodymyr Zelensky yabwiye inteko ishingamategeko y'Ubwongereza ko "ubwisanzure buzatsinda", mu ruzinduko rwe rwa mbere mu Bwongereza kuva Uburusiya bugabye igitero ku gihugu cye.

Yashimiye Ubwongereza "ubutwari" bwabwo, anavuga ko iki gihugu, binyuze mu bufasha giha Ukraine, kitatezutse ku "ndangagaciro z'ibi birwa [amazinga mu Kirundi] bikomeye".

Yanavuze mu izina Boris Johnson mu kumushimira, avuga ko uyu wahoze ari Minisitiri w'intebe w'Ubwongereza yatumye abandi bashyira hamwe "igihe byasaga nk'ibidashoboka".

Mbere yaho, yagiranye ibiganiro na Minisitiri w'intebe w'Ubwongereza Rishi Sunak mu biro bye bya Downing Street.

Ubwo yagezaga ijambo ku mbaga y'abadepite n'abagize inteko ishingamategeko umutwe wa sena, mu nyubako ya Westminster Hall, yagize ati: "Ubwisanzure buzatsinda – turabizi ko Uburusiya buzatsindwa".

Yongeyeho ko Ubwongereza buri kumwe n'igihugu cye mu rugendo rwerekeza "ku ntsinzi y'ingenzi cyane yo mu gihe cy'ubuzima bwacu".

Mu ijambo rye, yahaye impano umukuru w'inteko ishingamategeko y'Ubwongereza umutwe w'abadepite, Sir Lindsay Hoyle, y'ingofero (casque) y'umupilote w'Umunya-Ukraine w'indege y'intambara.

Amagambo ayanditseho agira ati: "Dufite ubwisanzure, muduhe amababa yo kuburinda".

Uruzinduko rwe rubaye mu gihe imyitozo Ubwongereza buha abasirikare ba Ukraine yitezwe kwagurwa ikongerwamo no gutoza abapilote batwara indege z'intambara n'abasirikare barwanira ku butaka no mu mazi (aba 'marines').

Ubwongereza bwanatangaje ikindi cyiciro cy'ibihano bwafatiye Uburusiya.

Ibi bihano bishya byibasira kompanyi z'ikoranabuhanga, n'izikora ibikoresho bya gisirikare, nk'indege ntoya z'intambara zitarimo umupilote zizwi nka drone, n'izikora ibice by'indege za kajugujugu.

Hatangajwe gahunda yo gutoza, mu gihe kiri imbere, abapilote ba Ukraine gutwara indege ziri ku rwego rw'indege z'intambara zikoreshwa mu muryango w'ubwirinzi bwa gisirikare bw'Uburayi n'Amerika (OTAN/NATO), iki kikaba ari ikintu cy'ingenzi cyane Ukraine isaba.

Ibihugu byo mu burengerazuba (Uburayi n'Amerika) bimaze igihe byiga ku kongerera ubufasha Ukraine, mu gihe iki gihugu cyitegura ikindi gitero gikaze cy'Uburusiya muri uku kwezi.

Kwagura gahunda y'imyitozo Ubwongereza buha igisirikare cya Ukraine kugaragaza impinduka, nyuma yuko Ubwongereza buvuze ko "bidashoboka mu ngiro" ko bwakoherereza Ukraine indege zabwo.

Mu ijambo rye, Perezida Zelensky yanashishikarije Ubwongereza n'uburengerazuba gukomeza gushyiraho ibihano "kugeza Uburusiya bubuze ubushobozi bw'amafaranga bwo gukoresha mu ntambara".

Ati: "Umuntu uwo ari we wese ushora imari mu iterabwoba agomba kubiryozwa, umuntu uwo ari we wese ushora imari mu rugomo agomba kuriha indishyi abakorewe iterabwoba".