Karim Benzema: Kuri Twitter rutahizamu wa France yanditse ko kuyikinira 'birangiye'
Ahavuye isanamu, Reuters
Rutahizamu w'Ubufaransa Karim Benzema yatangaje kuri Twitter ko urugendo rwe mu ikipe y'igihugu "rurangiye".
Benzema, ku wa mbere wujuje imyaka 35, ntiyashoboye gukina imikino y'igikombe cy'isi muri Qatar kubera imvune, mu gihe ikipe y'Ubufaransa – Les Bleus – yatsinzwe na Argentine ku mukino wa nyuma kuri penaliti 4-2.
Yakiniye Ubufaransa imikino 97, atsindamo ibitego 37, none ubu bigaragara ko yasezeye ku gukinira ikipe y'igihugu.
Yagize ati: "Nanditse amateka yanjye none ayo dufitanye ararangiye.
"Nagize umuhate ndetse nkora n'amakosa byari bicyenewe kugira ngo ngere aho ndi uyu munsi kandi binteye ishema!"
Ahavuye isanamu, Getty Images
Uyu rutahizamu wa Real Madrid yakuwe mu ikipe y'Ubufaransa mu gihe kigera hafi ku myaka itandatu, nyuma y'ikibazo cyo gukangisha gutangaza amashusho y'imibonano ya Mathieu Valbuena bahoze bakinana, ariko yayigarutsemo mu mikino y'igikombe cy'Uburayi cya Euro 2020.
Ukuntu yari ahagaze neza ku rwego rwa 'club' (ikipe) akinira, harimo no gufasha Real Madrid gutsindira igikombe cya 14 cya Champions League mu mwaka ushize w'imikino, yabihembewe atsindira bwa mbere umupira wa zahabu (Ballon d'Or) – igihembo cy'umukinnyi warushije abandi ku isi – mu kwezi kwa cumi muri uyu mwaka.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Mu gusubiza ku butumwa bwa Benzema kuri Twitter, Real yanditse ubutumwa bwa 'emoji' ikoma amashyi hamwe n'ibendera ry'Ubufaransa, mu gihe konti ya Twitter y'impuzamashyirahamwe y'umupira w'amaguru ku isi (FIFA) ijyanye n'irushanwa ry'igikombe cy'isi yabusubije igira iti: "Urakoze, Benzema".
