'Ndarengana…Ndacyari Perezida wa Venezuela' – Amagambo ya Maduro mu rukiko
Ahavuye isanamu, Reuters
Nicolás Maduro wa Venezuela wakuwe ku butegetsi na Amerika bwa mbere yagejejwe imbere y'urukiko i New York we n'umugore we aho bombi bahakanye ibyaha baregwa n'iki gihugu.
Amasaha macye mbere yaho i Caracas, Delcy Rodríguez wari visi-perezida yari amaze kurahira nka Perezida w'inzibacyuho wa Venezuela, aho yasabye ko perezida wemewe w'iki gihugu arekurwa na Amerika.
Rodríguez w'imyaka 56, wari visi-perezida kuva mu 2018, yavuze ko atewe agahinda no "gushimutwa" kwa Maduro n'umugore we, Cilia Flores, aho bakuwe mu rugo rwabo mu ijoro ryo ku wa gatanu bucya ari ku wa gatandatu mu gitero kidasanzwe cy'abakomando ba Amerika.
Mu rukiko i New York Maduro yahakanye ibyaha bishingiye ku bucuruzi bw'ibiyobyabwenge aregwa mu rubanza rutangiye kandi ruzakurikiranwa n'abantu benshi ku isi.
Abategetsi batandukanye hamwe n'abatavuga rumwe n'ubutegetsi bwa Trump muri Amerika, bavuga ko mu gufata Maduro ubutegetsi bwa Washington butari mu ntambara ku biyobyabwenge ahubwo bugamije kwigarurira ibitoro by'iki gihugu, gifite 20% by'ububiko kamere bw'ibitoro bidatunganyije biri kw'isi.
Ni ibiki byabaye mu rukiko?
Iburanisha ryatangiye Umucamanza Alvin Hellerstein w'imyaka 92 asomera Maduro ibyaha bine aregwa, n'umugore we ibyaha bitatu aregwa.
Umushinjacyaha mukuru wa Amerika Pam Bondi ku wa gatandatu yatangaje ibyo byaha baregeye uru rukiko rwo mu mujyi wa New York:
- Umugambi w'iterabwoba n'ibiyobyabwenge
- Umugambi wo kwinjiza [muri Amerika] Cocaine
- Gutunga za 'machineguns' n'ibintu biturika
- Umugambi wo gutunga za 'machineguns' n'ibintu biturika byo kugirira nabi Amerika
Mu rukiko, Maduro yari yambaye umupira w'ubururu y'ijosi rya V hejuru y'undi mupira wa T-shirt wa 'orange' n'ipantaro ijya kuba ikaki, amaguru ye yari ahambiranyije.
We n'umugore we bari bambaye za 'headphones/écouteurs' zibahindurira ngo bumve ururimi rw'icyongereza.
Ahavuye isanamu, Reuters
Maduro w'imyaka 63 yasabye ijambo muri uru rukiko ruri mu gace ka Manhattan.
Umucamanza Alvin atararimuha yagize ati: "Muri aka kanya, ndashaka kumenya ikintu kimwe. Ni wowe Nicolas Maduro Moros?", uyu perezida wakuweho yemeje uwo mwirondoro we.
Maze ahawe umwanya ngo agire icyo avuga ku byo aregwa,yagize ati: "Ndarengana. Ibyo byaha ndabihakana. Ndi umugabo wiyubashye kandi ndacyari Perezida wa Venezuela".
Umucamanza yamuciye mu ijambo amubuza gukomeza, ati: "Hari igihe n'ahantu tuzagera kuri ibyo byose".
Umugore we Flores w'imyaka 69 yabanje gusubiramo amazina ye maze na we ahakana ibyaha bitatu aregwa ati: "Ndi 'first lady' wa Venezuela…Ndarengana byuzuye"
Umucamanza yasubiyemo uburenganzira bemerewe n'amategeko burimo kunganirwa ndetse no kutagira icyo bavuga mu rubanza rwabo.
Maduro yunganiwe na Barry Pollack, umunyamategeko w'i Washington wigeze kunganira abantu barimo Julian Assange. Naho umugore we yunganiwe na Mark E. Donnelly umunyamategeko w'i Houston muri leta ya Texas.
Umucamanza yashoje iri buranisha ryamaze iminota 30 gusa, avuga ko bazongera kuburana tariki 17 Werurwe (3).
Uru rubanza byitezwe ko rushobora kuzamara amezi menshi.
Abantu barimo gusohoka, umwe mu baturage bari bitabiriye iburanisha yateye ijwi hejuru abwira Maduro mu rurimi rw'Icyespanyole ngo "ishyura" ibyo yakoze.
Maduro yamuhindukiriye aramusubiza ati: "Ndi Perezida washimuswe" kandi ko ari "imfungwa y'intambara", nuko asohorwa mu rukiko n'umugore we inyuma ye.
