Uwahohotewe n'Umurusiya wafashe abagore videwo z'urukozasoni batabizi yaganiriye na BBC

Umwe mu bagore uvuga ko yafashwe amashusho ya videwo mw'ibanga n'Umurusiya, Vladislav Liulkov, ubwo yari mu ruzinduko muri Ghana, yavuze ku byo yavuganye n'uwakoze akanasakaza izo videwo.

Uyu mugore, uwo umwirondoro we wahishwe mu rwego rwo kurinda umutekano we, yabwiye BBC Pidgin ko yanze cyane uwo mugabo, abategetsi ba Ghana bemeje ko ari Umurusiya.

Imbuga nkoranyambaga ziriho amashusho y'abagore benshi bivugwa ko baryamanye n'uwo mugabo ndetse bagafatwa amajwi n'amashusho mu ibanga muri Ghana no muri Kenya.

Minisitiri w'Itumanaho muri Ghana, Samuel George, avuga ko iperereza ryakozwe n'inzego z'umutekano ryagaragaje ko Vladislav Liulkov "yafashe amashusho y'ibikorwa by'ibanga ari kumwe nabo bagore kandi akinjiza amafaranga ku mbuga za interineti."

Abategetsi muri Ghana babwiye BBC ko bamwe mu bahohotewe bamaze gutanga ibirego ku mugaragaro ku rwego rushinzwe umutekano w'ikoranabuhanga ndetse na polisi ishinzwe iperereza ku byaha (CID).

Minisitiri w'Uburinganire, Abana n'Imibereho Myiza, Agnes Naa Momo Lartey, yavuze ko ibiro bye birimo gutanga ubufasha bwo mu mutwe ku bahohotewe bagaragaje ko ari bo bahohotewe.

Amakuru atandukanye yemeje ko atari abagore bose bajyanywe n'ukekwaho icyaha muri hoteli yari acumbitsemo.

Hari n'abandi banze burundu gushukwa n'uwo Murusiya, nka Juliet (si izina rye nyakuri), wavuganye na BBC Pidgin abivuga.

Yagize ati: "Yarankurikiranye n'igihe maze kumuhakanira, ndibuka ko hari umunsi namuhakaniye [kujyana nawe] imbere y'abana banjye bato".

Juliet yabwiye BBC Pidgin ko yahagaritswe n'uwo mugabo washatse kumujyana muri hoteli ubwo yari imbere y'iduka rinini i Accra, aho yari yajyanye n'abana be gutembera.

Yagize ati: "Yarampagaritse arambwira ngo ndi mwiza; mbere nabanje gutekereza ko ari ishimwe gusa, cyane cyane ko n'abana banjye ari beza.

"Ariko yabisubiyemo yongeraho ko yashakaga ko tumenyana, nyuma tukazakorana n'ubukwe ibintu biramutse bigenze neza."

Juliet yavuze ko uyu umugabo w'Umurusiya yamukurikiye kugeza ageze aho imodoka zihagarara kugira ngo ajyane abana be ahandi hantu.

Yagize ati: "Yansabye ko tujyana kugira ngo menye aho atuye; ntabwo nari nshishikajwe nabyo."

Muri videwo ngufi nyinshi yashyize kuri interineti, amagambo yatangije ikiganiro cye ni aya: "Witwa nde? Uri mwiza, ngwino tujyane."

Ayo magambo arangiye Juliet akomeza kwanga, avuga ko yatangiye kumukoraho atabimwemereye.

Yagize ati: "Nararakaye nari ndambiwe kuba yaransabye kumukurikira muri hoteli ye igihe nari kumwe n'abana banjye, ako kanya ahita ankora ku rutugu, hafi kunkurura, ubwo nari ndimo kwinjira muri taxi."

Juliet yabwiye BBC ko Vladislav atacitse intege "kugeza ubwo yazamuye ijwi rye hejuru cyane, afasha umwe mu bana be kwinjira muri taxi."

Yagize ati: "Abana barimo bandeba ubwo yakomezaga kumfata ku rutugu, ndetse na telefoni yanjye yaguye hasi icyo gihe, imbere y'abana banjye."

Ubwo yabazwaga uburyo yakiriye inkuru ko amafoto na videwo by'abandi bagore bisangijwe kuri interineti, Juliet yavuze ko yababaye cyane.

Minisitiri w'itumanaho muri Ghana yaburiye abantu ko batagomba gukwirakwiza amavidewo n'amashusho by'abahohotewe, avuga ko iki gikorwa ari icyaha gihanwa n'amategeko agenga umutekano w'ikoranabuhanga muri icyo gihugu.

Juliet yavuze ko ahangayikishijwe n'ibyabaye.

Yagize ati: "Numva mbabaye iyo mbonye ayo mafoto; anyibutsa icyo kintu cyabaye; byari kuba ari njye iyo nza kumukurikira uwo munsi," asaba abaturage kureka gushinyagurira no gutesha agaciro abahohotewe.

Bivugwa ko Vladislav Liulkov yahinduye amajwi y'ibanga kugira ngo ahuze n'ibyo akeneye mu bijyanye no kwinjiza amafaranga kuri internet.

Juliet yizera ko icyo ari icyaha gihanwa n'amategeko.

"Videwo nabonye zarahinduwe, ntabwo zerekana neza ibiganiro yagiranye n'abagore bose. Inyinshi muri zo zakozwe ku buryo byagaragaye ko abahohotewe bose bamukurikiye nyuma yo guhura na we", Ni ko avuga.

Juliet yifuza ko abaguye mu mutego w'uwo Murusiya bakwiye gufashwa aho gusekwa.

Yongeraho ati: "Buri wese akora amakosa, turi abantu. Iki si cyo gihe cyo gushinyagurira bashiki bacu, nashoboraga kwihanganira isoni iyo nza kuba ndi muri ayo mashusho, ariko undi muntu ashobora kutayihanganira; mu by'ukuri bamwe mu bahohotewe baba bafite ibitekerezo byo kwiyahura.

"Nizeye ko guverinoma yacu ishobora kumugeza imbere y'ubutabera."

Uburusiya ntibutanga abaturage babwo mu bindi bihugu kugira ngo bakurikiranwe n'amategeko.

Minisitiri w'itumanaho wa Ghana, Samuel George, yemeje ibi nyuma y'inama bagiranye na ambasaderi w'Uburusiya muri Ghana, Sergei Berdnikov.

Mu kiganiro n'abanyamakuru giherutse, Samuel George yavuze ko "polisi ifatanyije n'inzego zishinzwe umutekano w'ikoranabuhanga bazashyikiriza ikibazo Interpol kugira ngo itange impapuro mpuzamahanga zo kumuta muri yombi aho ari ho hose hatari mu Burusiya mu gihe abonetse."

Yanagaragaje ko Vladislav Liulkov ashobora gushinjwa nubwo yaba atari mu rukiko.

Juliel yagize ati:"Uyu mugabo yagiranye ibiganiro n'ababagore kandi abafata amajwi batabyemeye; icyo ni ikibazo gikomeye. Guverinoma ikwiye kugira icyo ibikoraho"

Yifuza ko abahohotewe bahabwa umwanya wa mbere mu guhabwa ubuvuzi n'ubujyanama mu by'imitekerereze.

Ati: "Aba bagore bakeneye kwitabwaho no kuvurwa muri iki gihe; abantu bazabacira urubanza, babaseke, ariko bakwiye kureba ishusho rusange, ibi nabyo bizashira."

Itegeko rya Ghana ry'umutekano w'ikoranabuhanga ribuza gufata no gukwirakwiza amashusho y'abantu ku giti cyabo nta ruhushya rw'abayarimo.

Abantu bahamwe n'iki cyaha bashobora gufungwa imyaka 25, bitewe n'uburemere bw'icyaha nk'uko biteganywa n'iryo tegeko.