Ghana irashaka kohererezwa Umurusiya ushinjwa gutangaza nta ruhushya videwo z'ubusambanyi
Ahavuye isanamu, Getty Images
- Umwanditsi, Makuochi Okafor
- Igikorwa, BBC Afurika, i Lagos muri Nigeria
- Igihe co gusoma: iminota 2
Leta ya Ghana yasabye kohererezwa umugabo w'Umurusiya ushinjwa gufata mu buryo bunyuranyije n'amategeko amashusho y'imibonano mpuzabitsina yagiranye n'abagore b'Abanya-Ghana, ubundi agatangaza izo videwo ku mbuga za internet nta ruhushya abasabye.
Ibitangazamakuru byo muri Afurika no mu Burusiya byatangaje uko uwo ucyekwa ari umugabo wigize ureshya abagore binyuze mu kubahenda ubwenge, kubirariraho cyangwa kubashyiraho agahato (ibizwi nka 'pick-up artist'), utangaza ku mbuga za internet (umu-'blogger'), uri mu kigero cy'imyaka 30, wari wagiye muri Ghana gufata amashusho rwihishwa y'imibonano ye n'abagore.
Ibitangazamakuru byo muri Ghana no mu Burusiya byatangaje ko uwo mugabo ucyekwa yakoreshaga indorerwamo zirinda izuba ziriho 'camera', agafata videwo z'imwe mu mibonano ye n'abo bagore akazitangaza ku mbuga nkoranyambaga, nubwo abategetsi batemeje ibi.
Avugana n'abanyamakuru ku wa gatandatu, Sam George, Minisitiri w'itumanaho, ikoranabuhanga no guhanga udushya, yavuze ko yatumiye ambasaderi w'Uburusiya muri Ghana kugira ngo baganire kuri ibyo bivugwa ko byabaye.
Mbere yaho kuri uwo munsi, minisiteri y'uburinganire, kwita ku bana no kurengera imibereho yavuze ko iperereza ry'ibanze ryumvikanisha ko uwo muntu ashobora kuba atakiri muri Ghana. Iyo minisiteri yongeyeho ko ibi "ntibigabanya ubukana bw'imyitwarire ivugwa cyangwa inshingano ya Leta yo gutuma abiryozwa".
Minisitiri w'itumanaho wa Ghana, Sam George, yavuze ko yasabye ambasaderi w'Uburusiya i Accra, umurwa mukuru wa Ghana, ko Uburusiya bufatanya na Ghana mu gutuma abahohotewe babona ubutabera. Uburusiya ntibwohereza mu mahanga abaturage babwo bashakishwa n'ubucamanza, keretse gusa mu bihe bidasanzwe.
Minisitiri George yagize ati: "Uwo mugabo azashakishwa, tuzakoresha uburyo bwose dufite mu gukorana na Interpol [polisi mpuzamahanga].
"Tuzasaba abategetsi b'Uburusiya – ndetse ni yo mpamvu natumiye ambasaderi w'Uburusiya – gukorana n'urwego rwacu rushinzwe kugenzura iyubahirizwa ry'amategeko.
"Turashaka ko uwo mugabo agarukanwa muri Ghana, yoherezwa muri Ghana kugira ngo yumve ubukana bw'amategeko yacu."
George yavuze ko ubucamanza bwa Ghana buzaburanisha adahari uwo mugabo ucyekwa naramuka atishyikirije ubucamanza ngo aburanishwe.
Amakuru yo ku mbuga za internet yumvikanisha ko no muri Kenya uwo muntu acyekwaho kugira uruhare mu bikorwa binyuranyije n'amategeko bisa n'ibyo.
Itegeko rya Ghana ry'umutekano wo kuri internet ryo mu 2020 riteganya ko umuntu uwo ari we wese utangaje amafoto y'urukozasoni agaragaza abana cyangwa abantu bakuru atabiherewe uruhushya mu buryo bwuzuye, ashobora gufungwa imyaka igera kuri 25.
