Afurika y'epfo: Umuhungu wa Robert Mugabe yatawe muri yombi akekwaho kugerageza kwica umuntu
Ahavuye isanamu, Anadolu Agency via Getty Images
- Umwanditsi, Nobuhle Simelane, i Johannesburg, na Damian Zane
- Igihe co gusoma: iminota 2
Polisi y'Afurika y'Epfo yataye muri yombi umuhungu muto w'uwahoze ari Perezida wa Zimbabwe, Robert Mugabe, akekwaho icyaha cyo kugerageza kwica umuntu, nyuma y'uko havuzwe ko habayeho kurasana ku nyubako iri mu gace gatuwe n'abifite k'i Johannesburg.
Bellarmine Mugabe, w'imyaka 28, yafashwe nyuma y'uko umugabo w'imyaka 23, bivugwa ko yakoraga isuku mu busitani, arashwe agakomereka.
Polisi yavuze ko mu isaka ryakorewe mu nzu iherereye i Hyde Park, aho Bellarmine Mugabe yari acumbitse, habonetse amasasu (bullet cartridges) ariko ntihabonetse imbunda.
Bellarmine Mugabe ni umuhungu muto wa Robert Mugabe n'umugore we wa kabiri Grace Mugabe. Robert Mugabe, wapfuye mu 2019, yategetse Zimbabwe imyaka 37, nyuma ahatirwa kuva ku butegetsi afite imyaka 93, hari mu mwaka wa 2017.
Undi mugabo yatawe muri yombi hamwe na Bellarmine Mugabe, mu gihe abakora iperereza bakomeje akazi kabo, nkuko byavuzwe n'umuvugizi wa polisi Koloneli (Col) Dimakatso Nevhuhulwi.
Itangazo rya polisi rivuga ko bombi bitezwe kugezwa mu rukiko "vuba aha".
Polisi ntiratangaza ku mugaragaro ko Bellarmine Mugabe ari umwe mu bafashwe, ariko abanyamakuru bari bari aho byabereye bamubonye yambitswe amapingu, kandi itangazamakuru ryo muri Afurika y'Epfo ryamuvuze cyane nk'umwe mu bafashwe.
Umuvugizi wa polisi yongeyeho ko umuntu wakomeretse ari mu bitaro, kandi ko ameze nabi cyane, nyuma yo kuraswa isasu rimwe.
Mu kiganiro n'abanyamakuru cyabereye hanze y'iyo nyubako, Col Nevhuhulwi yavuze ko abo bakekwa bombi batarababwira aho imbunda iherereye ndetse ko nta cyo bari babwira polisi kijyanye n'iyo mbunda.
