Uburusiya bwatangaje ibyo mu nama y'ingabo z'Ubudage yiga kuri Ukraine

Ubudage bwemeye igisa nko kwinjirirwa muri mudasobwa kwakozwe n'Uburusiya kw'inama ya gisirikare, aho abasirikare bakuru baganiriye ku guha Ukraine misile zirasa mu ntera ndende - n'ahantu ishobora kuzirasa.

Iyo nama yakozwe mu buryo bw'amajwi na videwo, yashyizwe ku mbuga nkoranyambaga n'umukuru wa televiziyo RT ya leta y'Uburusiya.

Abo basirikare bakuru bungurana ibitekerezo ku kuntu misile zishobora kurasa ku iteme rya Kerch, rihuza Uburusiya n'umwigimbakirwa wa Crimea bwiyometseho mu buryo bunyuranyije n'amategeko.

Abanyapolitiki bo mu Burusiya bavuze ko ayo majwi agaragaza ko "umwanzi ukomeye" wabwo arimo gutegura ibitero.

Ku wa gatandatu, umukuru wa leta y'Ubudage, Olaf Scholz, yise icyo gisa nko kumeneka kw'ibanga "ikibazo gikomeye cyane kandi ni yo mpamvu ubu kirimo gukorwaho iperereza mu bwitonzi cyane, n'imbaraga nyinshi cyane kandi vuba cyane".

Ikinyamakuru Der Spiegel cyo mu Budage cyatangaje ko iyo nama yo mu buryo bw'iyakure bwa videwo itakorewe ku muyoboro w'ibanga w'imbere mu gisirikare cy'Ubudage, ahubwo ko yakorewe ku rubuga WebEx.

Amajwi amara iminota 38 yatangajwe ku wa gatanu na Margarita Simonyan, umukuru wa televiziyo RT, wavuze ko ari ikimenyetso cyuko Ubudage burimo gutegura ibitero kuri Crimea.

Muri ayo majwi, humvikanamo ibiganiro ku buryo ingabo za Ukraine zishobora gukoresha misile zo mu bwoko bwa Taurus zikorwa n'Ubudage, ndetse n'ingaruka izo misile zishobora guteza.

Umugore uvugira minisiteri y'ingabo z'Ubudage yabwiye ibiro ntaramakuru AFP ko ikiganiro cyo mu ibanga cy'igisirikare cy'Ubudage kirwanira mu kirere cyumvirijwe.

Ariko yavuze ko adashobora kuvuga nta gushidikanya niba amajwi yumvikana yarahinduwe mbere yuko atangazwa.

Maria Zakharova, umuvugizi wa minisiteri y'ububanyi n'amahanga y'Uburusiya, yasabye Ubudage gutanga ibisobanuro "byihuse".

Yagize ati: "Amagerageza yo kwirinda gusubiza ibibazo azafatwa nko kwemera icyaha."

Dmitry Medvedev, umuyobozi wungirije w'akanama k'umutekano k'Uburusiya, yanditse ku rubuga Telegram ati: "Abacyeba bacu b'igihe kirekire cyane - Abadage - bahindutse nanone abanzi bakomeye bacu.

"Umva, ukuntu mu buryo bwimbitse kandi bureba akantu ku kandi (Abadage) baganira ku gutera ubutaka bwacu bakoresheje misile zirasa mu ntera ndende, guhitamo aho kurasa ndetse baganira uburyo bwo kugirira nabi cyane bishoboka igihugu cyacu kavukire n'abaturage bacu."

Ku wa gatandatu, Minisitiri w'ububanyi n'amahanga w'Uburusiya Sergei Lavrov yavuze ko icyo kiganiro cyagaragaje "imigambi y'ubucakura" y'ingabo z'Ubudage, yavuze ko "zishyize hanze mu buryo bugaragara".

Ukraine ishaka ko Ubudage buyiha misile za Taurus, zifite ubushobozi bwo kurasa kugeza mu ntera ya kilometero 500.

Kugeza ubu 'Chancellor' Scholz yarabyanze, kubera ubwoba ko ibyo byatuma intambara ifata indi ntera.

Ubufaransa n'Ubwongereza byahaye Ukraine misile za SCALP-EG cyangwa misile za Storm Shadow, zombi zirasa mu ntera ya kimwe cya kabiri cy'aho Taurus zo zirasa.

Roderich Kiesewetter, wo mu bakomeye ku bya kera batavuga rumwe n'ubutegetsi mu Budage, yaburiye ko andi majwi na videwo bishobora gushyirwa ku karubanda.

Yabwiye igitangazamakuru ZDF cyo mu Budage ati: "Ibindi biganiro byinshi nta kabuza byarafashwe ndetse bishobora gushyirwa ku karubanda mu gihe kiri imbere mu nyungu z'Uburusiya."

Yavuze ko bishoboka ko "icyo kiganiro cyashyizwe ku karubanda ku bushake n'Uburusiya muri iki gihe hari icyo bugamije cyihariye", nko "kubuza ko Ubudage butanga Taurus".