Kagame na Uwimana batorewe kuyobora FPR-Inkotanyi
Ahavuye isanamu, FPR-Inkotanyi
Ishyaka FPR-Inkotanyi ryatoye Consolée Uwimana kuba visi perezida waryo yungirije Perezida Paul Kagame, uyu ni we mugore wa mbere utorewe uyu mwanya muri iri shyaka rimaze imyaka 29 ku butegetsi.
Uwimana yatowe ku cyumweru ku bwiganze bw’abari mu nama rusange y’iri shyaka, asimbura Christophe Bazivamo wari umaze imyaka irenga 20 kuri uwo mwanya.
Iyo nama kandi yongeye gutorera Perezida Kagame (ku majwi 99%) kuba umukuru w’iri shyaka mu yindi myaka itanu iri imbere, uyu mwanya awuriho kuva igihe yasimburaga Colonel Alexis Kanyarengwe mu 1998.
Gutorwa kwa Perezida Kagame muri FPR-Inkotanyi bimuha amahirwe menshi yo kuyibera umukandida ku mwanya w’umukuru w’igihugu mu matora ateganyijwe umwaka utaha.
Kagame watsinze amatora ya perezida aheruka ku majwi hafi 99%, aheruka kuvuga ko byombi bishoboka ko aziyamamaza cyangwa ataziyamamaza mu 2024.
Abashyigikiye ubutegetsi bwe bamaze igihe bavuga ku mbuga nkoranyambaga ko ari we bifuza ko yiyamamaza mu 2024.
Uwimana watorewe kungiriza Kagame muri FPR ntabwo asanzwe ari umunyapolitiki uzwi cyane, azwiho kuba yarabaye senateri kugeza mu 2019.
Ahavuye isanamu, Paul Kagame/Facebook
Itorwa rye ribonwa nko kuzamura abagore mu mwanya wo hejuru muri iri shyaka no gukomeza kuringaniza amoko mu butegetsi bw’iri shyaka.
Iyo nama rusange yajemo intumwa z’amashyaka ari ku butegetsi muri Angola, u Burundi, Ubushinwa, Centrafrique, Ethiopia, Mozambique, Tanzania, Uganda, Sudan y'Epfo na Zimbabwe, nk’uko ishyaka FPR ryabitangaje.
Kuza muri iyi nama kw'intumwa z'ishyaka CNDD-FDD ryo mu Burundi nyuma y'imyaka y'umubano mubi ni ikimenyetso ko umubano w'ibihugu byombi uri gufata intambwe nziza.
Muri iyi nama kandi habaye amatora yo gusimbuza umunyamabanga mukuru wa FPR, aho Ambasaderi Wellars Gasamagera yasimbuye François Ngarambe wari umaze imyaka 20 kuri uwo mwanya.
