Ikindi gitero cya 'drone' na misile cy'Uburusiya cyishe abantu i Kyiv

Perezida wa Ukraine Volodymyr Zelensky yavuze ko Uburusiya bwagabye igitero kinini cy'indege nto z'intambara zitajyamo umupilote (drone) ku murwa mukuru Kyiv mu ijoro ryacyeye, cyishe abantu nibura babiri naho abandi 16 barakomereka.

Zelensky yongeyeho ko icyo gitero cyakoreshejwe misile 18 na 'drone' zigera hafi kuri 400, ahanini cyari kigambiriye umurwa mukuru.

Abategetsi b'i Kyiv bavuga ko ibisigazwa bya 'drone' byaguye ku gisenge cy'inyubako yo kubamo iri mu karere ka Shevchenkivskyi kari rwagati muri uwo mujyi ndetse ko imiriro yatse mu bice binyuranye by'umujyi.

Amashusho yatangajwe ku mbuga nkoranyambaga, kuri ubu ataragenzurwa na BBC, agaragaza ibiturika mu kirere nijoro, mu gihe amatsinda y'ubwirinzi bw'ikirere yatangiraga gusubiza inyuma icyo gitero.

Minisiteri y'ingabo ya Ukraine yanaburiye ko hari inkeke y'igitero cya misile zo mu bwoko bwa 'ballistic'.

Mu ijoro ryo ku wa kabiri, Ukraine yatangaje ko yagabweho n'Uburusiya igitero cya mbere kinini cyane cyo mu kirere, nyuma yuko 'drone' 728 na misile 13 zo mu bwoko bwa 'cruise' cyangwa 'ballistic' zirashe ku mijyi inyuranye yo mu gihugu.

Mu masaha yo mu gitondo cya kare kuri uyu wa kane, ubutegetsi bwa gisirikare bwa Kyiv bwatangaje ko habaye ibitero bya 'drone' by'Uburusiya mu turere dutandatu two muri uwo mujyi.

Mu butumwa yatangaje ku rubuga nkoranyambaga rwa Telegram, umukuru w'ubwo butegetsi bwa Kyiv, Tymur Tkachenko, yagize ati: "Inyubako zo kubamo, ibinyabiziga, inzu zo kubikamo ibintu, inyubako z'ibiro [zikorerwamo] n'inyubako zitari izo kubamo zirimo gushya."

Nyuma yaho yagize ati: "Birababaje ko twapfushije abantu babiri."

"Aba bantu bishwe n'Abarusiya. Iki ni igihombo gikomeye."

Mu karere ka Podilsky ko muri Kyiv, ikigo nderabuzima cy'ubuvuzi bw'ibanze "cyashenywe hafi burundu", nkuko Meya ('Mayor') wa Kyiv, Vitali Klitschko, yabivuze.

Abatuye uwo mujyi bashishikarijwe kujya ahantu ho kwikinga kugeza impuruza iburira ku bitero byo mu kirere irekeye aho kuvuga, ndetse bagafunga amadirishya igihe baba basubiye mu ngo zabo kuko hari "umwotsi mwinshi" i Kyiv.

Mu ijoro ryacyeye, igisirikare cya Ukraine kirwanira mu kirere cyatangaje ko hari inkeke y'ibitero bya 'drone' by'Uburusiya mu turere twinshi. Ntibyahise bisobanuka niba hari abantu bakomeretse cyangwa bishwe hanze y'umurwa mukuru Kyiv.

Igisirikare cy'Uburusiya nta cyo cyari cyatangaza kuri iki gitero gishya cyatangajwe.

Mu yandi makuru:

Iki gitero gishya kibaye nyuma yuko Perezida w'Amerika Donald Trump avuze ko arimo kurambirwa kurushaho kubera Perezida w'Uburusiya Vladimir Putin.

Ku wa kabiri, Trump yabwiye abanyamakuru ati: "Putin atuzanaho ubucucu bwinshi cyane, niba mushaka kumenya ukuri."

"Buri gihe cyose atwitwaraho neza cyane, ariko bigaragara ko [ibyo] birangira nta cyo bivuze [bimaze]."

Dmitry Peskov, umuvugizi w'ibiro bya perezida w'Uburusiya (Kremlin), yavuze ko Uburusiya "buratuje cyane kuri ibi. Uburyo Trump avugamo muri rusange buba bukakaye cyane, [aha ndavuga] imvugo akoresha".

Abo bategetsi bombi bamaze igihe baganira mu buryo buhoraho ariko kugeza ubu bananiwe kubibyaza ingamba zifatika ziganisha ku gahenge muri Ukraine – ikintu Trump yigeze kuvuga ko yari gushoborakugerahomu munsi umwe.

Kuva yasubira ku butegetsi muri Mutarama (1) uyu mwaka, Trump akomeje gukangisha ko azafatira ibihano Uburusiya ariko kugeza ubu nta gihano na kimwe arabufatira.

Kuri uyu wa kane, biteganyijwe ko Minisitiri w'ububanyi n'amahanga w'Amerika Marco Rubio aza guhura na Minisitiri w'ububanyi n'amahanga w'Uburusiya Sergei Lavrov, iruhande rw'inama ibera muri Malaysia.

Putin yagabye igitero gisesuye kuri Ukraine muri Gashyantare (2) mu mwaka wa 2022.