Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Uburusiya na Ukraine byahererekanyije imfungwa 206
Uburusiya na Ukraine byahererekanyije imfungwa 206 zo mu ntambara, mu masezerano yagezweho bigizwemo uruhare na Emira Zunze Ubumwe z'Abarabu (UAE).
Minisiteri y'ingabo z'Uburusiya yavuze ko abasirikare babwo 103 barekuwe ari bamwe mu bafatiwe mu gitero cyo mu karere ka Kursk.
Ubwo yatangazaga amafoto amwe y'abasirikare ba Ukraine barekuwe ku wa gatandatu, Perezida wa Ukraine Volodymyr Zelensky yagize ati: "Abantu bacu bari mu rugo."
Mu kwezi gushize, abasirikare ba Ukraine bagabye igitero gitunguranye hakurya y'umupaka mu Burusiya, batera intambwe bagera muri kilometero 30 mu karere ka Kursk.
Zelensky yavuze ko Abanya-Ukraine barekuwe barimo 82 b'ipeti rya 'private' na serija ('sergeant') na 21 bo ku rwego rwo hejuru bo mu ngabo za Ukraine, abo mu mutwe w'inkeragutabara (abasirikare basezerewe mu ngabo bitabazwa bibaye ngombwa), abarinzi b'umupaka, n'abo muri polisi.
Yavuze ko bafashwe ubwo bari barimo barwana ku turere tw'umurwa mukuru Kyiv, Donetsk, Mariupol, Azovstal, Luhansk, Zaporizhzhia na Kharkiv.
Uburusiya bwavuze ko abasirikare babwo barekuwe bari muri Belarus (Biélorussie) kandi ko bazahabwa "ubufasha bwa ngombwa bwo mu mitekerereze n'ubw'ubuvuzi" ndetse ko bazemererwa kuvugana n'abo mu miryango yabo, mbere yuko basubizwa mu Burusiya.
UAE, muri rusange yakomeje kutagira uruhande ibogamiraho muri iyi ntambara, yabaye umuhuza mu mahererekanya y'imfungwa yabayeho mbere.
Muri Kanama (8) uyu mwaka, nyuma y'igitero mu karere ka Kursk, ihererekanya ry'imfungwa ry'ibanze ryabayeho, imfungwa 230 zose hamwe zirahererekanywa.
Igitero cya Ukraine mu karere ka Kursk, ku ruhande rumwe cyari kigamije gukwega abasirikare b'Uburusiya bakava mu bikorwa barimo mu burasirazuba bwa Ukraine.
Uku guhererekanya imfungwa gushya kubaye mu gihe Uburusiya bwavuze ko bwisubije icyaro cyo mu burasirazuba bwa Ukraine, aho bwateye intambwe nyinshi mu byumweru bya vuba aha bishize.
Ku wa gatandatu, minisiteri y'ingabo z'Uburusiya yavuze ko abasirikare babwo bafashe icyaro cya Zhelanne Pershe cyo mu karere ka Pokrovsk.
Icyo cyaro kiri mu ntera itageze kuri kilometero 30 uvuye mu mujyi wa Pokrovsk, urimo stasiyo ikomeye ya gariyamoshi ndetse uri mu masangano y'imihanda myinshi y'ingenzi (ikomeye).
Uwo mujyi ufite uruhare rukomeye cyane nk'ihuriro ry'ibikoresho by'ingabo za Ukraine ziri mu karere ka Donbas ko mu burasirazuba, ndetse hashize amezi ari wo ntego y'ingenzi y'ingabo z'Uburusiya.
