Trump yakangishije gufunga ikiraro gishya kigiye kuzahuza Amerika na Canada

Perezida Donald Trump yatangaje ko ashobora guhagarika ifungurwa ry'ikiraro gihuza Leta Zunze Ubumwe za Amerika na Canada kugeza igihe Washington izaba "yishyuwe byuzuye ku bintu byose" yavuze ko yahaye umuturanyi wayo wo mu majyaruguru.

Ikiraro Gordie Howe, gihuza intara ya Ontario muri Canada na leta ya Michigan muri Amerika, ntikizafungurwa kugeza igihe Ottawa izaba "ifata Leta Zunze Ubumwe za Amerika mu buryo bukwiye n'icyubahiro dukwiye," niko Trump yanditse ku mbuga nkoranyambaga.

Nk'uko bigaragara ku rubuga rw'uyu mushinga, iyubakwa ry'ikiraro riri guterwa inkunga na leta ya Canada ariko kizaba ari umutungo rusange wa Canada na leta ya Michigan.

Senateri wa Michigan, Elissa Slotkin wo mu Ishyaka ry'Abademokarate, yavuze ko gufunga uwo "mushinga w'igikorwaremezo gifite akamaro gakomeye cyane" byaba "bibi cyane ku bukungu bwa leta yacu."

Yavuze ko iki cyemezo gishobora kugira "ingaruka zikomeye cyane", mu butumwa yashyize kuri X agira ati: "Ibiciro biziyongera ku bucuruzi bwo muri Michigan, n'urujya n'uruza rw'ibicuruzwa rugabanuke, mu by'ukuri hazabaho kugabanuka kw'akazi."

Ntiharamenyekana neza uko Trump ashobora guhagarika ifungurwa ry'iki kiraro, ariko yavuze ko ibiganiro byakabaye bitangira, atabisobanuye birambuye.

Iki kiraro, cyambuka umugezi wa Detroit, biteganyijwe ko kizafungurirwa imodoka nyuma y'isuzumwa rya nyuma, muri izi ntangiriro z'uyu mwaka.

Kubaka iki kiraro byatangiye mu 2018, ariko uyu mushinga umaze imyaka irenga icumi utera impaka hagati y'ibihugu byombi.

Bigereranywa ko kucyubaka byatwaye miliyari 6.4 z'amadolari ya Canada nk'uko byatangajwe n'ikigo cy'itangazamakuru cya Canada, Canadian Broadcasting Corporation (CBC).

Mu itangazo yashyize ku rubuga rwe rwa Truth Social, Trump yavuze ko Amerika yagombye gutunga "byibura kimwe cya kabiri cy'uyu mutungo", ko Canada ifite uruhande rw'ikiraro rwo muri Canada n'urwo muri Amerika.

Ikigo cyubatse uyu mushinga, Windsor-Detroit Bridge Authority, gifitwe 100% na guverinoma ya Canada, nk'uko bigaragara ku rubuga rw'umushinga.

Trump yanditse ati: "Guverinoma ya Canada yumva gusa ko njye, nka Perezida wa Amerika, nyemerera gusa 'kungukira kuri Amerika!'"

Yongeyeho ati: "Sinzemera ko iki kiraro gufungurwa kugeza igihe Amerika izaba yishyuwe byuzuye ku bintu byose twabahaye."

Yanagaye uwahoze ari Perezida Barack Obama kuba yaremeye ko batangira kubaka iki kiraro hadakoreshejwe icyuma na kimwe cyo muri Amerika.

Ariko umukuru w'agace ka Windsor muri Ontario, ku ruhande rwa Canada rw'ikiraro, Drew Dilkens, yabwiye CBC ko ibyo Trump avuga atari byo.

Yagize ati: "Birenze ukwemera. Sinshobora kwizera ibyo ndimo gusoma."

Umuryango wa Moroun, abanyamerika ba nyiri indi kiraro kiri hafi kizwi nka Ambassador Bridge nacyo gihuza Detroit na Canada, basabye Trump mu gihe cya manda ye ya mbere guhagarika iyubakwa ry'iki kiraro gishya, bavuga ko kibangamira uburenganzira bwabo bonyine bwo gukusanya imisoro y'abagicayo.

Mu gusubiza uwo muryango icyo gihe, Trump n'uwari Minisitiri w'Intebe wa Canada Justin Trudeau basohoye itangazo bahuriyeho rivuga ko iki kiraro [gishya] ari "umuyoboro w'ubukungu w'ingenzi cyane" hagati y'ibihugu byombi.

Guverineri wa Michigan wo mu Ishyaka ry'Abademokarate, Gretchen Whitmer, yamaganye iterabwoba rya Trump ryo guhagarika ifungurwa ry'iki kiraro, avuga ko ari ingenzi ku mirimo muri leta ayobora.

Ku wa Mbere, Trump yagarutse ku makimbirane aherutse mu bucuruzi hagati y'ibihugu byombi, avuga ko "imisoro Canada imaze imyaka myinshi ishyira ku bicuruzwa byacu by'amata, ntiyakwihanganirwa."

Yanavuze kandi ko amasezerano y'ubucuruzi Canada yasinye n'Ubushinwa mu kwezi gushize "azasenya Canada burundu."

Ariko Slotkin yasubije kuri ibi, avuga ko impamvu yonyine Canada yari hafi kugirana amasezerano y'ubucuruzi n'Ubushinwa ari uko Trump "yayikubise bikomeye mu gihe cy'umwaka wose."

Yongeyeho ko Canada ari inshuti, atari umwanzi, kandi asezeranya gukora ibishoboka byose kugira ngo umushinga usubire ku murongo.