DR Congo: Abantu 35 biciwe mu gitero cya ADF – ibivugwa n'igisirikare

Intagondwa zigendera ku mahame akaze ziyitirira idini ya Islam zishe abantu nibura 35 mu gitero zagabye mu ijoro ryacyeye mu cyaro cyo mu burasirazuba bwa Repubulika ya Demokarasi ya Congo, nkuko bitangazwa n'ibiro ntaramakuru Reuters.

Kapiteni Anthony Mualushayi, umuvugizi wa gisirikare muri ako gace, yabwiye Reuters ko icyo gitero cy'inyeshyamba zo mu mutwe wa ADF, ukomoka muri Uganda, cyari kigamije kwihimura ku gikorwa cya gisirikare cyo guhashya inyeshyamba.

Icyo gitero cyabereye mu cyaro cya Mukondi, kiri ku ntera ya kilometero zigera kuri 30 mu majyepfo y'umujyi wa Beni mu ntara ya Kivu ya Ruguru, yibasiwe n'ibikorwa by'inyeshyamba.

Kuva mu mwaka wa 2021, iyo ntara – n'intara bituranye ya Ituri – itegetswe n'igisirikare mu kugerageza kugarura umutekano muri izo ntara zikize ku mabuye y'agaciro, ariko hakomeje kurangwa umutekano mucye.

Kapiteni Mualushayi yatanze uwo mubare w'agateganyo w'abantu 35 bishwe, mu kiganiro cy'amajwi yagiranye n'umunyamakuru wa radio yo muri ako gace, yamuhaye kuri WhatsApp, cyagenzuwe na Reuters.

Yavuze ko icyo gitero cyakozwe mu kwihimura ku kuba igisirikare gifunze abakorana na ADF barenga 22 no kuba cyarafunze za farumasi (pharmacies) zivugwa ko zahaga uwo mutwe ibinyabutabire byo kwifashisha mu gukora ibisasu.

Yavuze ko ubu muri rusange ituze ryagarutse, abashinzwe umutekano n'abakozi bo mu muryango utabara imbabare wa Croix-Rouge bakaba bageze aho byabereye, n'ibikorwa byo kwitegura gushyingura abishwe bikaba birimo kuba.

Kapiteni Mualushayi yanavuze ko abasirikare ba leta barimo guhiga izo nyeshyamba ngo batabare abantu zashimuse.

Reuters yasubiyemo amagambo ya Mumbere Limbadu Arsène, ukuriye umuryango utegamiye kuri leta (société civile) muri ako gace, we watanze umubare w'agateganyo w'abapfuye w'abantu 44, barimo abagore, abana n'abageze mu zabukuru.

Yongeyeho ko hari benshi mu bahatuye bakiburiwe irengero.

ADF ishinjwa kwica abaturage b'abasivile b'Abanye-Congo babarirwa mu bihumbi no kugaba ibitero by'ibisasu muri Uganda.

Mu mwaka wa 2020 wonyine, uyu mutwe wishe abasivile barenga 849, nkuko bivugwa n'akanama k'umutekano k'umuryango w'abibumbye (ONU/UN).

Umutwe wa ADF watangiye ugaba ibitero muri Uganda, mbere yuko wimukira mu burasirazuba bwa DR Congo mu myaka ya 1990.

Mu 2021, Amerika yawushyize ku rutonde rw'imitwe y'iterabwoba. Ni umwe mu mitwe yitwaje intwaro irenga 100 ikorera mu burasirazuba bwa DR Congo.