Indege zarwanye intambara ya II y’isi zagonganye ziri mu myiyereko
Indege ebyiri zo mu gihe cy’intambara ya kabiri y’isi zagonganye zirashwanyuka ubwo zari mu myiyereko muri leta ya Texas muri Amerika.
Amashusho yerekana izi ndege zisekurana ziri ku butumburuke bugufi, imwe igacikamo kabiri ndetse igahita ishya igeze hasi.
Izi ndege – imwe ni Boeing B-17 – zari mu gikorwa cyo kumurika amateka hafi y’umujyi wa Dallas.
Umuare w’abari muri izi ndege ntiwahise umenyekana neza, gusa abantu babiri byatangajwe ko bapfuye.
Allied Pilots Association ihagarariye ishyirahamwe ry’abapilote muri Amerika, ivuga ko Terry Barket na Len Root - babiri mu bahoze muri iryo shyirahamwe –bapfuye muri uku kugongana.
Ikigo gishinzwe iby’indege za gisivile kivuga ko kizakora iperereza kuri uku kugongana kwabaye kuwa gatandatu, mu kumurika indege zarwanye intambara ya kabiri y’isi.
Iyo myiyereko ubundi imara iminsi itatu yari irimo kuba bigendanye n’umunsi wa ba sekombata, wari kuwa gatanu, abantu hagati ya 4,000 na 6,000 bari baje kwihera ijisho.
Eric Johnson ukuriye umujyi wa Dallas yavuze ko ibyabaye ari “akaga gakomeye”.
Yanditse kuri Twitter ati: “Amashusho ateye ubwoba. Nimusengere abantu bagiye mu kirere ngo bahugenze kandi bigishe imiryango yacu uyu munsi.”
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Umubare wose w’abapfuye n’inkomere nturamenyekana, nk’uko Johnson yabivuze, ariko yongeraho ko nta muntu wari ku butaka wakomeretse.
Urubuga rw’iyi myiyereko ruvuga ko indege nyinshi za cyera zari kuri gahunda yo kuguruka kuwa gatandatu zikiyerekana.
Indege za B-17 zirasa amabombe zagize uruhare runini mu gutsinda Abadage mu ntambara ya kabiri y’isi.
Indege ya kabiri, P-63 Kingcobra, yari indege y’intambara nayo yarwanye muri iyo ntambara, ariko ikoreshwa gusa n’ingabo zo mu kirere z’Abasoviyeti.
B-17 ubusanzwe ijyamo abantu bane cyangwa batanu, naho P-63 ijyamo umupilote umwe, nk’uko Hank Coates uri mu bategura icyo gikorwa abivuga.
Ati: “Iki ni igikorwa cyo kwerekana indege zo mu ntambara ya II y’isi aho tugaragaza ubushobozi zari zifite.”
