DR Congo: Tshisekedi yashyizeho umugaba w’ingabo mushya
Ahavuye isanamu, DRC Presidency
Perezida Félix Tshisekedi yasimbuje General Célestin Mbala Munsense wari umugaba mukuru w’ingabo za DR Congo ashyiraho Lieutenant-General Christian Tshiwewe Songesha.
Izi mpinduka zatangajwe mu itangazo ryasomwe kuri televiziyo y’igihugu n’umuvugizi wa perezida, Tina Salama.
General Célestin Mbala Munsense yari umugaba mukuru w’ingabo za DR Congo kuva mu 2018.
General Munsense ari ku rutonde rw’abasirikare biteganyijwe ko bajya mu kiruhuko cy’izabukuru, nk'uko bivugwa na Radio RFI y'abafaransa.
Naho Lt Gen Tshiwewe, w’imyaka 54, wamusimbuye yari asanzwe ari umugaba w’umutwe w’ingabo zirinda umukuru w’igihugu kuva mu 2020.
Tshiwewe yahise asimburwa na Gen Maj Ephraïm Kabi Kiriza.
Ingabo za DR Congo zinengwa kandi ziri ku gitutu ko ubwazo zananiwe guhashya ikibazo cy’imitwe y’inyeshyamba mu burasirazuba bw’igihugu bwahindutse akarere k'umutekano mucye.
Hashize amezi arenga atatu inyeshyamba za M23 zirukanye ingabo za leta mu mujyi wa Bunagana n'uduce tuyikikije mu ntara ya Kivu ya ruguru.
Lt Gen Tshiwewe agiye kuyobora ingabo zinengwa ruswa n'imyifatire idahwitse mu ntambara zirwana n'imitwe y'inyeshyamba mu burasirazuba.
Tshiwewe yakoze amasomo n’amahugurwa ya gisirikare muri Sudan, muri Angola, no mu ishuri rikuru rya gisirikare ry’i Kinshasa.
