DR Congo: Abaturage barenga 50 bishwe n'inyeshyamba bikekwa ko ari CODECO
Abasivile barenga 50 bishwe barashwe abandi batemaguwe n'inyeshyamba ku cyumweru mu gace k'ikirombe cya zahabu ahitwa Mabilindeyi muri teritwari ya Djugu, Intara ya Ituri, nk'uko umukuru wa sosiyete sivile yaho abivuga.
Dieudonné Lossa yabwiye BBC Gahuzamiryango ko mu bishwe harimo abagore n'abana kandi ko byakozwe n'inyeshyamba za "CODECO nk'ibisanzwe".
Lossa avuga ko kugeza ubu imibare nyayo y'abapfuye n'inkomere itaramenyekana neza kandi ishobora kwiyongera mu gihe hari abagishakishwa bashobora kuba bishwe.
Itangazo rya ministeri y'itumanaho ya DR Congo rivuga ko icyo gitero cyagabwe n'inyeshyamba za CODECO.
Mu gitondo ku cyumweru, inyeshyamba zitwaje intwaro zateye kariya gace k'ubucukuzi bw'amabuye y'agaciro zirarasa mbere yo kwirara mu baturage zibica zinatwika inzu zabo.
Mu majwi umunyamakuru wigenga muri aka gace yahaye BBC, umwe mu barokotse iki gitero yavuze ko "aba CODECO binjiye muri camp Blakette saa kumi z'igicuku" bakica abantu.
Uwo mugore yagize ati: "Imirambo irenga 50 twayibonye, n'inkomere zigera kuri 30. Batwitse inzu zigera ku 100. Abantu benshi bahungiye mu ishyamba n'ahantu hatazwi."
Radio Okapi yo muri DR Congo ivuga ko abapfuye bagera kuri 60 naho abakomeretse bakaba barenga 30.
Amafoto ababaje y'abishwe BBC yabonye yerekana abatemaguwe mu mutwe, harimo abagore n'abana.
Umugore warokotse iki gitero yavuze ko basaba abashinzwe umutekano gukaza ibikorwa byo kurinda abaturage. Ati: "Nibyo tubasaba buri munsi ariko ntagikorwa, ntituzi icyo tuzakora."
Muri Gashyantare (2) inyeshyamba za CODECO nanone muri teritwari ya Djugu zateye inkambi y'impunzi zica abarenga 50 zikomeretsa abagera kuri 45. Ubwicanyi bwamaganywe na benshi.
Mu kwezi gushize i Nairobi abakuru b'ibihugu by'akarere bemeranyijwe gushyiraho "ako kanya" ingabo z'akarere zo kurwanya imitwe yitwaje intwaro mu burasirazuba bwa DR Congo, izanga gushyira intwaro hasi mu biganiro byahise bikurikiraho.
CODECO ni umwe mu mitwe yatumiwe n'ibiro bya perezida ikanga kwitabira ibyo biganiro bya Nairobi bigamije gusaba inyeshyamba gushyira intwaro hasi.
Ubu bwicanyi muri Ituri bukomeje mu gihe iyi ntara imaze igihe kirenga umwaka mu bihe bidasanzwe by'amategeko ya gisirikare aho ingabo zahawe uburenganzira ku bikorwa byose bigamije kurwanya imitwe yitwaje intwaro.
