Ukraine: Ibiganiro by'amahoro byaba birangiye mu gihe abarinzi b'i Mariupol bakwicwa – Zelensky

Perezida wa Ukraine Volodymyr Zelensky yavuze ko intumwa z'igihugu cye mu biganiro by'amahoro n'Uburusiya zizabivamo Uburusiya niburamuka bwishe abarwanyi ba Ukraine bakiri mu ruganda rwo gutunganya ibyuma rwa Azovstal mu mujyi wa Mariupol, mu majyepfo ashyira uburasirazuba.

Zelensky yabwiye abanyamakuru ati: "Niba abagabo [abarwanyi] bacu bishwe muri Mariupol, Ukraine izava mu biganiro ibyo ari byo byose".

Abo barinzi barimo abasirikare b'aba marine, abarwanyi bo mu mutwe utavugwaho rumwe wa Azov, abarinzi b'umupaka n'abapolisi.

Ni bo barwanyi ba nyuma ba Ukraine basigaye muri Mariupol, umujyi umaze ibyumweru umishwaho ibisasu n'Uburusiya.

Amakuru avuga ko hari abasivile bari kumwe na bo muri urwo ruganda ruri ku buso bwa kilometero kare 10.

Muri videwo yatangajwe n'umutwe Azov - watangiye ari umutwe w'abahezanguni nyuma ukaza gushyirwa mu nkeragutabara za Ukraine - abagore n'abana bari mu cyumba cyuzuyemo abantu, bumvikana bavuga ko barimo gushiranwa n'ibiribwa n'amazi, bagatakamba ngo bahungishwe.

Hagati aho, Perezida Zelensky yasabye ko habaho inama hagati ye na Perezida w'Uburusiya Vladimir Putin igamije gusoza iyi ntambara imaze amezi abiri.

Muri icyo kiganiro n'abanyamakuru mu murwa mukuru Kyiv ku wa gatandatu, Zelensky yagize ati: "Ntekereza ko uwo ari we wese watangije iyi ntambara azashobora no kuyisoza".

Yongeyeho ko "nta bwoba mfite bwo guhura" na Putin, mu gihe ibyo byatuma habaho kugera ku mahoro hagati y'ibihugu byombi.