Abarwanyi ba Ukraine baheze mu buvumo i Mariupol basohoye videwo
Ahavuye isanamu, Azov regiment
Umutwe wa Azov wo mu ngabo za Ukraine watangaje videwo isa nk'iyerekana abarwanyi bawo bazaniye ibiryo n'ubundi bufasha abagore n'abana bacumbitse muri bumwe mu buvumo (umwobo) bwo munsi y'uruganda rw'ibyuma rwa Azovstal - igice cya nyuma cy'umujyi wa Mariupol kitagenzurwa n'Uburusiya.
Muri iyo videwo, abagore n'abana - baboneka bari mu cyumba cyuzuyemo abantu - bumvikana bavuga ko barimo gushiranwa n'ibiribwa n'amazi, bakanasaba guhungishwa bagakurwa muri uwo mujyi wo mu majyepfo ashyira uburasirazuba, wagoswe n'abasirikare b'Uburusiya.
Bamwe muri abo bafashwe amashusho bavuga ko bamaze ibyumweru baraheze muri ubwo buvumo. Umukobwa umwe yavuze ko atarabona urumuri rwo hanze kuva ku itariki ya 27 y'ukwezi kwa kabiri - hari ku munsi wa kane w'igitero cy'Uburusiya kuri Ukraine.
Ibimenyetso binini by'amagambo "Abana" byo mu irangi ritukura, biboneka ku nkuta z'ubwo buvumo. Umugore umwe yumvikana avuga ko abana barenga 15 - kuva ku mpinja kugeza ku bafite imyaka 14 - bacumbitse muri iyi nyubako.
BBC ntiyashoboye kugenzura iyi videwo, bivugwa ko yafashwe ku itariki ya 21 y'uku kwezi kwa kane.
Uruganda rwa Azovstal - rugizwe n'imihora (imiyoboro) n'aho gutunganyiriza ibyuma - ruri ku buso bwa kilometero kare 10, rwagati muri Mariupol. Bisa nkaho ubwarwo ari umujyi uri imbere mu wundi mujyi.
Muri iki cyumweru, umwe mu bakomanda b'umutwe Azov yabwiye BBC ko abaturage benshi b'abasivile, barimo n'abana, bacumbitse muri urwo ruganda. Yanavuze ko abarwanyi bakomeretse n'abarwanyi bapfuye bari aho ngaho.
Uwo mutwe wa Azov na brigade (umutwe) y'aba marine (abarwanira mu mazi no ku butaka) ba Ukraine ndetse n'abarinda umupaka, n'abapolisi, baracyakomeza kurwana kuri Mariupol.
Igice kinini cya Mariupol cyarashenywe mu byumweru bishize uwo mujyi uraswaho ibisasu biremereye n'abasirikare b'Uburusiya, ndetse n'imihanda yawo iberamo imirwano ikarishye.
Muri iki cyumweru, Perezida w'Uburusiya Vladimir Putin yategetse abasirikare b'igihugu cye kureka gahunda yo kwinjira muri urwo ruganda, ahubwo bagakomeza kurugota.
Gufata icyambu (ikivuko mu Kirundi) cyo ku nyanja ya Azov ni intego y'ingenzi y'igitero Uburusiya bwagabye kuri Ukraine. Byatuma haboneka abandi basirikare bo kujya mu gitero cyabwo mu karere ka Donbas ko mu burasirazuba.
