Kenya: Imodoka itwara abagenzi yibasiwe n'igitero cy'igisasu

Igitero cy'igisasu cyibasiye imodoka itwara abagenzi mu majyaruguru ashyira uburasirazuba bwa Kenya.

Abanyamakuru bariyo bavuga ko abantu batari munsi y'icyenda bapfuye, naho abandi benshi barakomereka.

Iyo modoka yerekezaga mu mujyi wa Mandera uri mu kace k'umupaka Kenya ihana na Somalia, mu gihe cyashize kagiye kibasirwa n'ibitero by'intagondwa.

Amafoto y'abanyamakuru bariyo arimo gukwirakwira, agaragaza imodoka itwara abagenzi yashwanyaguritse, yo mu zizwi nka 'matatu' muri Kenya.

Bisa nkaho yabirindutse nyuma yo kunyura ku giturika cyatabwe mu muhanda.

Nta muntu wari wigamba iki gitero, ariko intagondwa zo mu mutwe wa al-Shabab mu myaka ishize zagabye ibitero kuri polisi no ku basivile mu mujyi wa Mandera no mu nkengero zawo byiciwemo abantu benshi, bituma Mandera haba hamwe mu hantu habi cyane ho kuba muri Kenya.

Iki gitero kibaye hashize hafi icyumweru ambasade nyinshi z'ibihugu by'amahanga - zirimo n'iya Leta Zunzwe Ubumwe z'Amerika n'iy'Ubufaransa - ziburiye abaturage b'ibyo bihugu ko hashobora kuba ibitero by'iterabwoba muri Kenya.

Nyuma yaho polisi yasohoye itangazo yongera kwizeza abaturage ko umutekano wabo urinzwe.