DR Congo – Idjwi: Abanyarwanda bari bahunze urukingo rwa Covid 'basubijwe iwabo'

Umwami wo ku kirwa Ijwi muri Kivu y'amajyepfo muri Repubulika ya Demokarasi ya Congo avuga ko Abanyarwanda bari bahageze bahunze urukingo rwa Covid-19 basubijwe iwabo mu Rwanda ku wa kane.

Ariko kuri uyu wa gatanu, ukuriye ishyirahamwe ry'abakomoka ku Ijwi yabwiye BBC Gahuzamiryango ko babiri mu Banyarwanda 101 bari bahahungiye baburiwe irengero, bakaba barimo kubashakisha na bo ngo basubizwe mu Rwanda.

Mu kiganiro na BBC Gahuzamiryango, Umwami Roger Ntambuka avuga ko bashoboye kubemeza gusubira iwabo, bakaba bahagurutse guhera mu masaha ya saa tanu z'amanywa (11h), mu bwato bagenewe, hamwe n'intumwa zo kubaherekeza.

Yagize ati: "Nta mpamvu yari ihari yatuma aba Banyarwanda baguma ku Ijwi. Twashoboye kubibemeza". Yavuze ko aba barimo abana, abagore n'abagabo.

Mbere yaho ku wa kane, ishyirahamwe ry'abakomoka ku kirwa (izinga mu Kirundi) cy'Ijwi ryari ryavuze ko ryifuza ko basubira iwabo "mu gihe cya vuba aha gishoboka".

Idé Bakulu Magadju, umukuru w'ishyirahamwe ry'abakomoka ku Ijwi baba i Bukavu, yabwiye BBC Gahuzamiryango ko guhera ku cyumweru ari bwo batangiye kugera kuri iki kirwa kiri mu kiyaga cya Kivu. Ati: "Batanga impamvu z'idini..."

Mu Rwanda nta dini rirahamagarira abayoboke baryo ku mugaragaro kwanga kwikingiza.

Kugeza mu gitondo cyo ku wa gatatu, abo Banyarwanda ni bo bari bamaze kugera ku Ijwi, bavuga ko bahunze guterwa urukingo "ku itegeko". Bari bacumbikiwe n'imiryango yabakiriye kuri icyo kirwa.

Leta y'u Rwanda ivuga ko kwikingiza Covid bikorwa ku bushake bw'uhabwa urukingo. Ariko nko kugenda mu modoka rusange zitwara abagenzi birabujijwe ku batarakingiwe.

Bwana Bakulu yagize ati: "Bava mu gice cy'uburengerazuba bw'u Rwanda... Icyo dushaka ni uko basubira iwabo mu gihe cya vuba aha gishoboka kuko natwe twagiye muri gahunda yo gukingira".

Guverineri w'intara y'uburengerazuba bw'u Rwanda yabwiye BBC Gahuzamiryango ko aya makuru y'aba Banyarwanda nta cyo ayaziho, ariko ko agiye kuyakurikirana.

Bwana Bakulu yongeyeho ati: "Ikindi, ni iki cyatubwira ko batazanye Covid hano? Kuko ntibigeze bagenzurwa".

"Ku Ijwi nta muntu n'umwe twari twagira wanduye iki cyorezo".

Ikirwa cy'Ijwi gituwe n'abaturage bagera ku 320,000, bari ku buso bwa kilometero kare (km²) 340.

Mu cyumweru gishize, u Burundi bwatangaje ko bwirukanye Abanyarwanda 12 bari bahungiye mu ntara ya Kirundo badashaka guhabwa urukingo.

Imibare ya minisiteri y'ubuzima mu Rwanda igaragaza ko abantu miliyoni 6 bamaze guhabwa doze zombi z'urukingo, ni ukuvuga abagera kuri 45% - ikigero cya mbere kiri hejuru muri aka karere.