Covid – Rwanda: 'Ni ibintu ngomba kwihutira gukora' – ugiye kwikingiza kubera ingamba nshya

Umukobwa ukorera akazi k'ibiraka mu mujyi wa Kigali utarakingirwa Covid-19 avuga ko ubu abona kwikingiza ari "ibintu byihutirwa", nyuma yuko ibiro bya minisitiri w'intebe bitangaje amabwiriza avuguruye yo guhangana n'iki cyorezo.

Ayo mabwiriza arimo nko gusaba abatwara imodoka rusange zitwara abagenzi bava cyangwa bajya i Kigali "gutwara gusa abagenzi bikingije Covid-19", no kuba ingendo mu gihugu zibujijwe kuva saa yine z'ijoro (22h) kugeza saa kumi za mu gitondo (4h).

Abitabira amateraniro mu nsengero na bo bagomba kuba barakingiwe mu buryo bwuzuye, nkuko bikubiye mu mabwiriza yatangiye kuri uyu wa mbere.

Uyu mukobwa warangije amasomo ya kaminuza ukorera i Kigali, wahisemo kudatangazwa izina, yabwiye BBC Gahuzamiryango ko nubwo atateganyaga kujya iwabo mu ntara y'amajyepfo muri iki gihe cy'iminsi mikuru yo mu mpera y'umwaka, abona "ibintu biri gufata indi ntera".

Ati: "[Kwikingiza] Ni ibintu ngomba kwihutira gukora. Ubundi nabonaga ntarirarenga.

"Najyaga kuri site [aho bakingirira] ukabona hari umurongo w'abantu benshi, ku buryo umuntu ukora utuntu ku ruhande atabona uwo mwanya [wo gutegereza]".

Nubwo ateganya kwihutira kwikingiza, asanga ishyirwa mu bikorwa ry'iyi ngamba ritoroshye, ati: "Kugira ngo abantu bazakatishe [tike] bagende, hari n'abantu batamenyereye kugendana indangamuntu kuko tuba twumva turi mu gihugu.

"Ntabwo turamenya neza uburyo bizakorwamo".

Ku mbuga nkoranyamba hari abagaragaje ko bishimiye aya mabwiriza mashya:

BBC ntibazwa ibivuye ku zindi mbuga.

Leta y'u Rwanda ivuga ko kwikingiza Covid atari itegeko, kandi ko izi ngamba nshya ziri mu rwego rwo "kurushaho gukumira ikwirakwira ry'iki cyorezo, cyane cyane muri iki gihe cy'iminsi mikuru yo mu mpera z'umwaka". Gusa ku mbuga nkoranyambaga hari bamwe bavuze ko izi ngamba nshya zirimo no kubangamira ubwisanzure bwabo.

Mu cyumweru gishize, Minisitiri w'ubuzima Dr Ngamije Daniel yatangaje ko mu gihugu habonetse abantu ba mbere basanzemo ubwoko bushya bwa Covid yihinduranyije bwa Omicron.

Kugeza ubu mu Rwanda abamaze guhabwa doze ya mbere y'urukingo bagera kuri miliyoni 7,2 naho abamaze guhabwa doze zombi bo bagera kuri miliyoni 4,8, nkuko imibare ya minisiteri y'ubuzima ibigaragaza.

Kuva iki cyorezo cyatangira, u Rwanda rumaze gutangaza abantu 1,344 bishwe na coronavirus.