Sudan: Al Jazeera ivuga ko umunyamakuru wayo wo ku rwego rwo hejuru yafunzwe

Televiziyo Al Jazeera ivuga ko abashinzwe umutekano muri Sudan bataye muri yombi umunyamakuru wayo El Musalmi El Kabbashi ukuriye ibiro byayo mu murwa mukuru Khartoum, nyuma yo gusaka urugo rwe kuri iki cyumweru.

Iyi televiziyo ifite icyicaro muri Qatar nta yandi makuru yatanze.

Hagati aho, ku wa gatandatu abantu batanu barishwe mu myigaragambyo yo kwamagana igisirikare cyahiritse ubutegetsi yabereye mu murwa mukuru no mu yindi mijyi, nkuko byavuzwe n'akanama gakuru k'abaganga muri Sudan.

Iryo tsinda ry'abaganga rivuga ko abigaragambya bane bapfuye kubera ibikomere by'amasasu, naho uwa gatanu akicwa no guherwa umwuka kubera imyuka iryana mu maso mu bushyamirane n'abashinzwe umutekano.

Abantu babarirwa mu bihumbi za mirongo bitabiriye imyigaragambyo mu mihanda yo mu mijyi y'iki gihugu bamagana ihirikwa ry'ubutegetsi ryakozwe n'igisirikare.

Polisi yahakanye ivuga ko itakoresheje amasasu nyamasasu mu kubatatanya, ivuga ko yakoresheje gusa "imbaraga nkeya zishoboka".

Televiziyo ya Sudan yatangaje ko abapolisi 39 "bakomeretse bikomeye" muri ubwo bushyamirane n'abigaragambya.

Urwo rugomo rwiciwemo abantu rubaye hashize iminsi hatangajwe ubutegetsi bw'akanama kayobowe n'igisirikare.

Ku wa kane Jenerali Abdel Fattah al-Burhan yatangajwe nk'umukuru w'ako kanama. Uyu wayoboye ihirikwa ry'ubutegetsi yari yaramaze gusesa igice kigizwe n'abasivile cya leta yari ishingiye ku masezerano yo gusaranganya ubutegetsi, afunga abategetsi b'abasivile, ndetse atangaza igihe cy'ibihe bidasanzwe mu gihugu mu kwezi gushize.

Ihirikwa ry'ubutegetsi ryakozwe n'igisirikare ku itariki ya 25 y'ukwezi kwa 10 ryamaganwe n'amahanga atandukanye.

Kuva icyo gihe abigaragambya bakomeje kujya mu mihanda mu buryo buhoraho, basaba ko ubutegetsi bwa gisirikare bwegura bugaha umwanya inzibacyuho (imfatakibanza mu Kirundi) ikozwe mu mahoro yerekeza ku butegetsi bwa gisivile.

Imyigaragambyo yo ku wa gatandatu yabaye nubwo hari hari abashinzwe umutekano benshi. Mu mahanga na ho habereye imyigaragambyo yo kwifatanya n'abari imbere mu gihugu, harimo nk'iyabereye i Paris mu Bufaransa n'i Berlin mu Budage.

Ibiro ntaramakuru AFP bitangaza ko abigaragambyaga i Khartoum bumvikanye batera hejuru bati: "Oya, oya ku butegetsi bwa gisirikare", banumvikana bavuga ngo "akanama [ka gisirikare] kose kaveho".

Amakuru y'abo bantu batanu bapfuye yatangajwe kuri paji yo kuri Facebook y'akanama gakuru k'abaganga bo muri Sudan, kanatangaje ko "umubare munini w'abantu" bakomeretse.

Aba baganga bongeyeho ko abashinzwe umutekano biraye mu bitaro byo mu mujyi wa Omdurman bagafunga abantu benshi bakomeretse.

Mu butumwa bwo kuri Twitter nyuma yuko ayo makuru atangajwe, ambasade y'Amerika i Khartoum yamaganye icyo yise "ikoreshwa ry'imbaraga z'umurengera" ku baturage bigaragambya basaba "ubwisanzure na demokarasi".