Michael Spavor wo muri Canada yakatiwe imyaka 11 ahamijwe ibyaha byo gutata muri China

Urukiko rwo mu Bushinwa rwahamije Umunya-Canada icyaha cyo gukora ubutasi rumukatira gufungwa imyaka 11.

Michael Spavor afunze kuva mu 2018, nyuma yo gufatwa we n'Umunya-Canada mugenzi we Michael Kovrig wari umudipolomate.

Umwanzuro w'uru rukiko uraza kugerageza umubano usanzwe urimo ibibazo hagati ya leta y'Ubushinwa n'iya Canada.

Bibaye mu gihe muri Canada Madamu Meng Wanzhou, umwe mu bakuriye uruganda rwa Huawei rw'Ubushinwa, nawe ari kuburana asaba koherezwa iwabo.

Bamwe banenga Ubushinwa gufata Spavor na Kovrig nk'ingurane yatuma bumvikana ku kurekura Meng Wanzhou.

Mu itangazo ryasohowe ku wa gatatu, urukiko rwa Danngong rwagize ruti:

"Ku cyaha cyo gutata no kugeza amabanga y'igihugu hanze bitemewe [Spavor] yakatiwe gufungwa imyaka 11, hafatirwa umutungo we w'agaciro ka 50,000 yuan (ni arenga miliyoni 7Frw) no koherezwa iwabo."

Iri tangazo ntirivuga igihe azoherezwa iwabo ariko ubusanzwe Ubushinwa bwohereza abahamwe n'ibyaha iwabo iyo barangije ibihano bakatiwe.

Ambasaderi wa Canada mu Bushinwa Dominic Barton, ku wa gatatu yavuze ko "yamaganye" iki cyemezo cy'urukiko.

Ibiro ntaramakuru AFP bivuga ko ari hanze y'urukiko yabwiye abanyamakuru ati: "Hari amahirwe yo kujurira".

Urubanza mu muhezo

Spavor yafashwe bwa mbere mu 2018, hashize iminsi micye Madamu Meng na we afashwe - nyuma yashinjwe ubutasi.

Iburanisha rye rya mbere ryabaye mu kwezi kwa gatatu, rirangira nta mwanzuro.

Abadipolomate ba Canada mu Bushinwa bangiwe kwinjira mu rukiko. Minisitiri w'intebe wa Canada Justin Trudeau yavuze ko uru rubanza mu muhezo ari "ibintu bidakwiye kwihanganirwa".

Spavor ni umwe mu bashinze Paektu Cultural Exchange, ikigo gifasha koroshya ubushabitsi n'iby'umuco na Koreya ya Ruguru. Bivugwa ari umuntu wa hafi ya Kim Jong-un.

Ku rundi ruhande, Michael Kovrig - nawe uregwa ibyaha nk'ibyo - nawe yaburanishijwe mu kwa gatatu, nubwo kuri we nta mwanzuro w'urukiko uratangazwa.

Ku wa kabiri, undi Munya-Canada yatsinzwe urubanza mu bujurire ku gihano cy'urupfu kubera kwinjiza ibiyobyabwenge mu Bushinwa.

Urukiko rwavuze ko rugumishijeho icyo gihano kuri Robert Lloyd Schellenberg kuko ibimenyetso by'icyaha kuri we "bihagije".

Schellenberg mbere yari yakatiwe gufungwa imyaka 15, biza guhinduka Canada ifashe Madamu Meng ku nyandiko zo guta muri yombi za Amerika.

Muri icyo gihe Ubushinwa bwari bwaburiye ingaruka niba Madamu Meng atarekuwe.

Schellenberg nyuma yajuririye igifungo cy'imyaka 15, aho kugabanya igihano cye abacamanza banzuye ko igihano yari yahawe cyari cyoroheje cyane bamukatira urwo gupfa.

Mu iburanisha rye, abacamanza bavuze ko ibimenyetso byerekana ko afite uruhare runini mu bucuruzi mpuzamahanga bw'ibiyobyabwenge.

Icyo gihe, Zhang Dongshuo, umunyamategeko wa Schellenberg, yabwiye ibiro ntaramakuru Reuters ko icyo gihano kitari kuzamurwa kuko nta bimenyetso bishya byagaragajwe mu rukiko rw'ubujurire.

Ambasaderi Barton avuga ko "bitari impanuka" ko igihano gishya cya Schellenberg cyaje mu gihe Madamu Meng yarimo aburana ku koherezwa iwabo.