Ethiopia – Tigray: Imirwano ikaze mu karere ka Amhara mu gihe intambara ikomeje

Haravugwa imirwano ikaze mu karere ka Amhara muri Ethiopia - iki kikaba ari cyo kimenyetso cya vuba aha cyuko intambara yo mu karere ka Tigray ko mu majyaruguru irimo kwadukira n'uturere bihana imbibi.

Abategetsi bo mu karere ka Amhara bavuze ko abasirikare ba leta ya Ethiopia n'abasirikare bo muri aka karere bamaze igihe barwana n'inyeshyamba zo mu mutwe wa Tigray People's Liberation Front (TPLF), ubu zirwanira mu mutwe uhuriwemo n'abandi barwanyi bo muri Tigray, wa Tigray Defence Forces (TDF).

Iyi mirwano ibaye mu gihe uturere dukomeje kwisuganya ngo turwanye TPLF.

Nubwo ibi biri kuba, umuvugizi wa Abiy Ahmed, Minisitiri w'intebe wa Ethiopia, yavuze ko agahenge katangajwe na leta mu kwezi gushize katakuweho.

Leta ya Ethiopia na TPLF buri ruhande rushinja urundi kwenyegeza iyi mirwano.

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa mu kwezi kwa cumi na kumwe mu 2020.

Leta ya Ethiopia ivuga ko TPLF ari umutwe w'iterabwoba, mu gihe inyeshyamba za TPLF zo zivuga ko ari zo leta y'akarere ka Tigray yemewe n'amategeko.

Mu yandi makuru, abategetsi bo mu karere ka Benishangul-Gumuz ko mu burengerazuba bw'igihugu bavuga ko abashinzwe umutekano baho bishe abarwanyi barenga 100 bo mu mutwe witwaje intwaro bavuga ko umaze igihe ukora ibitero byinshi bishingiye ku bwoko.

Ibi bibaye nyuma y'urugomo rwiciwemo abantu mu gice cy'uburasirazuba bw'igihugu, aho bamwe mu baturage b'abasivile bishwe mu turere duhana imbibi n'uturere twa Afar na Somali.