DR Congo: FARDC ihakana ko yananiwe kurangiza ikibazo cy'inyeshyamba muri Kivu y'epfo

Umuvugizi w'igisirikare cya DR Congo mu ntara ya Kivu y'Epfo avuga ko bari kwitegura bategereje itegeko ngo bamanuke basenye imitwe ya Mai Mai, Biloze Bishambuke na Twirwaneho n'indi iteza umutekano mucye muri iyo ntara.

Imirwano hagati y'iyi mitwe muri weekend ishize yatumye Abanyamulenge benshi mu gace ka Bijombo hafi ya Minembwe bahunga, inzu zabo ziratwikwa batewe na Mai Mai.

Abanyamulenge bo bavuga ko hari abasivile bishwe muri iyi mirwano ndetse hari abagore bashimuswe n'abarwanyi ba Mai Mai.

Imirwano y'imitwe yitwaje intwaro ishingiye ku moko imaze kugwamo abasivile benshi abandi bava mu byabo mu misozi ya Minembwe, Fizi na Uvira, kandi nta cyerekana ko izi ntambara zimaze igihe kirekire zizarangira vuba.

Mu kwezi gushize, habaye ibitero n'imirwano ikomeye y'iyi mitwe y'inyeshyamba zagiye zigabanaho ibitero bikagira ingaruka zikomeye ku basivile.

Muri iki cyumweru, umwe mu bakuriye umutwe wa Twirwaneho uvuga ko urengera ubuzima bw'Abanyamulenge yabwiye BBC ko ibitero Mai Mai yabagabyeho ku wa gatandatu byatumye hari benshi bahunga kuko inzu zabo zatwitswe.

Captain Dieudonné Kasereka, umuvugizi w'igisirikare cya FARDC muri Kivu y'Epfo, avuga ko muri rusange hari agahenge muri ako gace uretse imirwano yo ku wa gatandatu mu Bijombo yatumye abantu bahunga abandi bagakomereka.

Abanyamulenge 'ntibemera umuhate wacu'

Ingabo za leta ya DR Congo (FARDC) n'iz'umuryango w'abibumbye zihari zishinjwa kunanirwa kurandura imitwe yitwaje intwaro, cyangwa kurengera abaturage mu bushyamirane bw'iyi mitwe.

Abanyamulenge bavuga ko bibasirwa n'ubwicanyi bubakorerwa, bashinja imitwe ishamikiye ku yandi moko baturanye muri aka gace.

Kasereka avuga ko ingabo za FARDC zitagomba kurinda ubwoko bumwe.

Yabwiye BBC ati: "Abanyamulenge rero si bo bagomba guhora bavuga ngo FARDC nta cyo dukora, ducunga umutekano wa bose...Ikibabaje ni uko Abanyamulenge badashaka kwemera umuhate w'ingabo mu kubarinda."

Abarwanyi bava mu bihugu bituranyi

Kasereka ahakana ko FARDC yananiwe kurangiza ikibazo cy'izi nyeshyamba, ahubwo ashinja iyi mitwe ihora ihanganye kuzana abarwanyi bavuye mu bihugu bituranyi kuza kugirira nabi "abavandimwe babo" muri DR Congo.

Ati: "Ibyo bihugu turabizi ariko nta byo tuvuga amazina kuko twebwe turi abasirikare ntabwo turi abanyapolitiki."

Imitwe yitwaje intwaro y'Abarundi n'Abanyarwanda iba muri Kivu y'Epfo ivugwa mu mirwano y'iyi mitwe y'Abanyecongo iri ku ruhande rumwe cyangwa urundi.

Ingabo za leta z'ibi bihugu byegereye Kivu y'Epfo nazo mu gihe gishize na vuba aha zavuzwe kujya mu mirwano muri iyi ntara, ibyo ibi bihugu byagiye bihakana.

Captain Kasereka avuga ko bari kwitegura kurandura iyi mitwe y'inyeshyamba, nubwo imvugo nk'iyi atari nshya ku ruhande rw'ingabo za DR Congo.

Ati: "Turi kwitegura, nitubona itegeko tuzabanukaho bose, baba abakorana na Makanika ba Twirwaneho, ba Biloze Bishambuke, Mai Mai...abo bose tuzabakubita igihe nikigera."