France – Rwanda: Emmanuel Macron mu ruzinduko rugamije guhindura ibintu

Ku wa kabiri Perezida Emmanuel Macron yatangaje ko 'mu mpera z'ukwezi kwa gatanu' azasura u Rwanda, mu ruzinduko rugamije guhindura ibintu mu mubano.

Macron azaba abaye Perezida wa kabiri w'Ubufaransa usuye u Rwanda nyuma ya 1994 - ibihugu mbere y'uwo mwaka byari bifitanye umubano n'ubucuti mu bategetsi.

Mu kiganiro n'abanyamakuru nyuma y'inama ku gufasha Africa, Macron yavuze ko uruzinduko rwe mu Rwanda ruzaba rugamije 'politiki yo kwibuka, ubukungu, ubuzima n'ahazaza'.

Yagize ati: "Twumvikanye na Perezida Kagame kwandika ibihe bishya by'umubano, n'imishinga y'iterambere..."

Raporo 'zahinduye byinshi'

Mu 2017 Emmanuel Macron ageze ku butegetsi yavuze ko yifuza gukemuka kw'ibibazo by'umubano mubi hagati y'u Rwanda n'Ubufaransa kuva nyuma ya jenoside.

Leta y'u Rwanda ishinja iy'Ubufaransa uruhare mu gutegura, gukora no guhungisha abakoze jenoside, ibirego byakomeje kuba intandaro y'uwo mubano mubi.

Hagati ya 2006 na 2009 umubano w'ibihugu byombi warahagaze nyuma y'uko ubucamanza mu Bufaransa bushinje abari hafi ya Perezida Paul Kagame uruhare mu guhanura indege yari itwaye uwari Perezida Juvénal Habyarimana.

Mu 2010 Nicolas Sarkozy yabaye Perezida wa mbere w'Ubufaransa wasuye u Rwanda nyuma ya 1994. Ku byabaye mu Rwanda, ari i Kigali Sarkozy yemeye ko igihugu cye "cyakoze amakosa akomeye mu gusobanukirwa [ibyabaga]".

Mu 2014, inzu ndangamurage w'Ubufaransa mu Rwanda rwagati muri Kigali yarashenywe, abategetsi bavuga ko itubahirije amategeko y'imyubakire mu mujyi.

Mu mezi abiri ashize, raporo zasohowe na leta zombi ku byabaye mu Rwanda zihuriza ku ruhare runaka rw'ubutegetsi bw'Ubufaransa ku byabaye mu Rwanda. Perezida Macron na mugenzi we Kagame bavuga rumwe kuri izi raporo.

Kuri raporo y'Ubufaransa, ku wa mbere mu kiganiro na France 24, Perezida Kagame yagize ati: "Ni intambwe ikomeye igana imbere. Yenda ntakwibagirwa [amateka] ariko haba kubabarira kugira ngo tujye imbere."