Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Kagame i Paris: Ibyo wamenya byabaye mu ruzinduko rwe muri France
Perezida w'u Rwanda Paul Kagame wagiye i Paris ku mpamvu zinyuranye, uko Abanyarwanda bamwakiriye ku wa kabiri bitanga ishusho y'uko 'sosiyete igicitsemo kabiri'.
Inama ku gufasha Sudan yabaye ku wa mbere, n'inama ku gufasha ubukungu bwa Africa kuva mu cyuho kiri guterwa n'ingaruka za Covid, ni bimwe mu bikorwa bikomeye byamujyanye.
Gusa ku wa kabiri Abanyarwanda bashyigikiye ubutegetsi bwa Paul Kagame hamwe n'abagaragaza ko batamushyigikiye bagaragaye mu mihanda ya Paris bigaragambya.
Indirimbo, ibyapa biriho amagambo y'ikaze no gushima ibikorwa Kagame yagejeje ku Rwanda byari ku ruhande rw'abaje kugaragaza ko bishimiye urugendo rwe i Paris.
Ku rundi ruhande abandi Banyarwanda nabo babonetse bamagana uruzinduko rwe, bavuga ibibi bamushinja gukora mu gihugu, no muri DR Congo mu myaka yashize.
Kuri Timothy J. Oloo, umwarimu wa siyansi politiki muri kaminuza zo muri Kenya na Tanzania, ibi byerekana ubwisanzure ariko bikanerekana ko 'sosiyete y'Abanyarwanda igicitsemo kabiri'.
Mu butumwa bwanditse, yabwiye BBC ati: "Biriya byerekana ubwisanzure bw'ibitekerezo binyuranye ku butegetsi bw'u Rwanda abantu bashobora kugaragariza i Burayi, kuko yenda iwabo bidashoboka.
"Nubwo twabonye umuhate wa politiki ukomeye wo kubanisha Abanyarwanda nyuma ya jenoside, ibi impande zombi zivugira i Burayi kuri perezida wabo byerekana ko hari ukuntu sosiyete y'Abanyarwanda igicitsemo kabiri, ko leta igifite akazi kenshi".
Amateka akomeye n'umuturanyi
I Paris, Perezida Kagame yagiranye ibiganiro n'abahoze mu ngabo z'Ubufaransa bakoreye mu Rwanda hagati ya 1990 na 1994, ngo baganire ku mateka, nk'uko ibiro bya perezida bibivuga.
I Paris kandi, Kagame yagiranye ibiganiro n'abategetsi barimo Emmanuel Macron w'Ubufaransa, Cyril Ramaphosa wa Africa y'Epfo, Sahle Work Zewde wa Ethiopia, na Félix Tshisekedi wa DR Congo.
Muri iki gihe, ubutegetsi bwa DR Congo n'ubw'u Rwanda biri kuganira hagamijwe gukemura ikibazo cy'imitwe y'inyeshyamba mu burasirazuba bwa Congo, nk'uko impande zombi zibivuga.
Gusa Abanyecongo bamwe bashinja ubwicanyi ingabo z'u Rwanda bashingiye kuri 'Mapping report' [2010] ya ONU, hari ababigaragaje i Paris bavuga ko batishimiye guhura kwa Kagame na Tshisekedi.
Mu kiganiro na France24, Kagame yavuze ko nta byaha ingabo z'u Rwanda zakoze muri Congo nk'uko iyo raporo ibivuga, ahubwo ashinja ONU ko ari yo "yananiwe" mu myaka irenga 20 yoherejeyo ingabo kuhagarura amahoro.
Miliyari $100 kuri Africa
Perezida Emmanuel Macron yavuze ko inama yo ku wa kabiri kuri Africa yumvikanye ku gusaba ibihugu bikize ko kugeza nibura mu kwezi kwa 10 byaha Africa miliyari $100 aciye mu kigega cy'imari IMF/FMI.
Ayo mafaranga agafasha kwihutisha gukingira Covid-19, kuziba icyuho cy'imisoro ibihugu bya Africa byabuze, n'icyuho bifite cya miliyoni $285 yo gukoresha mu myaka ibiri iri imbere, nk'uko biri mu itangazo ryasohowe n'iyo nama.
Kristalina Georgieva ukuriye IMF yavuze ko ubukungu bwa Africa buzazamuka ku gipimo cya 2.1% mu 2021 ugereranyije na 6% y'igipimo cyo ku isi, nk'uko bivugwa n'ibiro ntaramakuru Reuters.
Kristalina avuga kandi ko iyo nkunga ya miliyari $100 nayo "idahagije" ugereranyije n'icyo cyuho cya miliyari $285.
