West Bengal: Leta yo muri India yakoze amatora nubwo habonetse impfu za mbere nyinshi

Abaturage bo muri leta ya West Bengal - imwe mu zigize Ubuhinde - bazindukiye mu cyiciro cya nyuma cy'amatora nubwo umubare w'abandura coronavirus ukomeje kwiyongera.

Imirongo miremire yabonetse hanze y'ibiro by'itora, bitera impungenge ko ubwandu bwa Covid-19 bushobora kurushaho gukwirakwira, mu gihe inkubiri ya kabiri y'ubwandu irimo kuyogoza iki gihugu.

Inzobere zisanzwe zifite ubwoba ko West Bengal ishobora kuba igiye gukurikiraho mu kuba izingiro ry'iyi virusi, bitewe n'uko ibikorwa byo kwiyamamaza byakomeje muri iyo leta kandi bikitabirwa n'imbaga.

Mu masaha 24 ashize, habonetse abanduye Covid bashya barenga 17,000 - ba mbere benshi babonetse muri iyo leta.

Iyi leta yo mu burasirazuba bw'igihugu, imaze gutora mu byiciro birindwi. Ni imwe muri nkeya aho Minisitiri w'intebe w'Ubuhinde Narendra Modi adafite ubwiganze bw'imyanya mu bategetsi bayo.

Habayeho kunenga bikomeye Bwana Modi kubera ko yakomeje kuhakorera za mitingi zitabirwa n'imbaga y'abantu, nubwo iyi virusi yari irimo kurenga ubushobozi bw'igihugu bwo guhangana nayo.

Umunyamakuru wa BBC Amitabha Bhattasali avuga ko zimwe muri mitingi zitabiriwe n'abantu benshi, zirimo n'izarimo Minisitiri w'intebe Modi, zagaragayemo imbaga z'abantu batambaye udupfukamunwa cyangwa ngo bahane intera.

Ni iki kirimo kuba ubu mu Buhinde?

Ibitaro byarengewe ubushobozi, umwuka wo guhumeka wa oxygen uri ku kigero cyo hasi cyane ndetse aho batwikira imirambo barimo gukora ubutaruhuka.

Imibare yatangajwe na leta igaragaza ko umubare wose w'abamaze kwicwa na coronavirus wamaze kurenga 200,000, ariko inzobere zivuga ko umubare nyawo ushobora kuba ari munini cyane gusumba uwo.

Kuri uyu wa kane, iki gihugu cyatangaje abanduye bashya 379,257, ba mbere benshi babonetse ku isi mu munsi umwe.

Uyu munsi wanabaye uwa mbere iki cyorezo cyishemo benshi kugeza ubu - abantu 3,645.

Iby'inkingo bimeze bite?

Leta y'Ubuhinde yari yavuze ko abantu bose bagejeje mu kigero cy'imyaka y'ubukure bazaba bemerewe guhabwa urukingo guhera ku itariki ya mbere y'ukwezi kwa gatanu, kwiyandikisha byatangiye ku itariki ya 28 y'uku kwezi kwa kane.

Ariko ku mbuga nkoranyambaga, abantu binubiye ko bananiwe kwiyandikisha kuko urubuga rwa internet rwahagaze gukora nyuma gato yuko rufunguwe.

Kugeza ubu, Ubuhinde burimo gukingira abakora mu rwego rw'ubuvuzi, abakora mu mirimo yindi ituma baba mu bafite ibyago byinshi byo kwandura n'abafite hejuru y'imyaka 45 y'amavuko.

Ariko abatageze ku 10% by'abaturage miliyari 1,3 batuye Ubuhinde ni bo bamaze kubona doze ya mbere y'urukingo, kandi hari impungenge ku kuba iki gihugu kizashobora guhaza abacyeneye inkingo bose.

Nubwo Ubuhinde buri mu bihugu bya mbere ku isi bikora inkingo nyinshi, ntabwo buragira inkingo zo guha abantu bagera hafi kuri miliyoni 600 bazaba bemerewe kuzihabwa guhera ku itariki ya mbere y'ukwezi kwa gatanu.

Ibiro bya perezida w'Amerika bya White House bivuga ko iki gihugu kirimo kohereza mu Buhinde inkingo za AstraZeneca cyari cyatumije, ngo bitume bugira doze zirenga miliyoni 20 z'uru rukingo.

Bhramar Mukherjee, impuguke mu guhangana n'indwara z'ibyorezo, avuga ko Ubuhinde bugomba gukomatanya ibikorwa by'ikingira na gahunda ya guma mu rugo mu gihugu hose, kugira ngo bushobore kugabanya ikwirakwira ry'ubwandu.

BBC ntibazwa ibivuye ku zindi mbuga.

Ibice byinshi by'Ubuhinde biri muri gahunda ya guma mu rugo n'isaha y'umukwabu abantu bagomba kuba bageze mu ngo, harimo no mu murwa mukuru Delhi.

Guverinoma yo muri leta ya Maharashtra, irimo n'umurwa mukuru w'ibikorwa by'imari wa Mumbai, irimo kwiga ku kongera igihe cyayo cya gahunda ya guma mu rugo kikagera hagati mu kwezi kwa gatanu.

Ariko nta guma mu rugo cyangwa umukwabu biri muri leta ya West Bengal.