Covid-19: Imfashanyo ya mbere ya UK yageze muri India mu gihe impfu zikomeje kwiyongera

Imfashanyo y'ibikoresho byo kwa muganga ivuye mu Bwongereza yageze mu Buhinde kuri uyu wa kabiri - iyi ni iya mbere y'amahanga igamije gufasha icyo gihugu guhangana n'ubwiyongere bukomeye bw'ubwandu bwa Covid-19.

Imashini zifasha abarwayi guhumeka (izi zizwi nka 'ventilators') n'ububiko bw'umwuka wa oxygen, byageze mu murwa mukuru Delhi.

Iki gihugu kuri uyu wa kabiri cyagize abanduye Covid-19 bashya bagera ku 320,000, naho abo imaze kwica bose hamwe kugeza ubu bagera hafi ku 200,000.

Ibitaro byarengewe ubushobozi, abantu bamwe bakaba bategerereza hanze mu mihanda ngo baze kugerwaho bavurwe.

Amerika, Ubufaransa n'Ubudage, ni bimwe mu bindi bihugu by'amahanga birimo kohereza mu Buhinde iyo mfashanyo icyenewe cyane.

Imfashanyo y'Ubwongereza igizwe n'imizigo 200 irimo za 'ventilators' n'ububiko bwa oxygen - buzafasha ibitaro gukoresha neza umwuka wa oxygen - yapakuruwe ku kibuga cy'indege cya Delhi.

Iyi mfashanyo yakiriwe gute?

Dr Zarir Udwadia, muganga akaba n'umujyanama wa leta y'Ubuhinde ukorera mu mujyi wa Mumbai, yabwiye BBC ko kugeza ubu imfashanyo yemewe n'amahanga ari "igitonyanga mu nyanja" kitazagira ikintu kinini gihindura.

Yavuze ko akibona "icyumba ku cyumba cyuzuye abarwayi barimo kunanirwa no guhumeka kuri 'ventilators' zitandukanye".

Dr Udwadia yavuze ko kwirara kwatewe no gukingirwa mu nkubiri ya mbere y'iki cyorezo, ubu kwatumye hasigaye haba hari imirongo miremire hanze y'ibigo nderabuzima y'ababyiganira gukingirwa.

Ati: "Kudashira amakenga inkingo byavuyemo kuzishaka cyane".

Kugeza ubu Ubuhinde bumaze gutanga urukingo rwa mbere kuri hafi 10% by'abaturage babwo.

Ku wa mbere, Perezida w'Amerika Joe Biden yavuze ko agiye kohereza mu mahanga doze miliyoni 60 z'urukingo rwa AstraZeneca.

Nubwo aho ruzoherezwa nyirizina hatatangajwe, Ubuhinde bushobora kuba buri mu bihugu bizarubonaho mbere.

Tedros Adhanom Ghebreyesus, umukuru w'ishami ry'umuryango w'abibumbye ryita ku buzima (OMS/WHO), yagize ati: "Turimo gukora icyo dushoboye cyose, dutanga ibikoresho bya ngombwa cyane n'imiti".

Ubufaransa bwohereje ibikoresho bikora umwuka wa oxygen, ibiwubika n'ibifasha guhumeka, ndetse n'ubundi bubiko bw'uyu mwuka burimo ubusa bwamaze kuhagera buvuye muri Thailand na Singapore (Singapour).

N'Ubuhinde bwongereye umuhate wabwo. Gariyamoshi ya mbere mu ziswe "Oxygen Express", yiyemeje gutwara toni 70 z'uyu mwuka, yageze i Delhi.

Ariko mu mijyi myinshi yo mu Buhinde, haracyava amashusho agaragaza abantu bategerereje hanze y'ibitaro bari mu modoka z'imbangukiragutabara (ambulances) cyangwa baryamye ku bitanda byakozwe hutihuti.

Ni mu gihe ahandi ho hagaragara umwotsi uva ku mirambo yatwitswe y'abazize iki cyorezo.