Bénin: Patrice Talon yatorewe manda ya kabiri n'amajwi 86%
Ahavuye isanamu, Getty Images
Perezida wa Bénin Patrice Talon yongeye gutorwa n'amajwi 86%, nkuko bigaragazwa n'imibare y'agateganyo yatangajwe n'akanama k'igihugu k'amatora.
Alassane Soumanou yagize amajwi hafi 11.3%, mu gihe Corentin Kohoué yaje ku mwanya wa gatatu n'amajwi 2.3%. Amatora yitabiriwe ku kigero cya 50%.
Biteganyijwe ko nyuma urukiko rurinda iremezo ry'itegekonshinga rutangaza ibyavuye mu matora bya nyuma.
Aya matora yo ku cyumweru ahanini yabaye mu mahoro, nyuma y'ibikorwa byo kwiyamamaza byaranzwemo urugomo.
Abakomeye mu batavuga rumwe n'ubutegetsi - ubu bari mu buhungiro cyangwa bakatiwe gufungwa - bari basabye rubanda kutitabira ayo matora.
Abandi na bo bangiwe guhatana kubera amavugurura mashya ajyanye n'amatora.
Ahavuye isanamu, AFP
Amatora ntiyabaye mu turere 13 muri 546 tugize iki gihugu, kubera ibibazo by'umutekano mu bice bimwe byo mu majyaruguru no hagati mu gihugu.
Mu karere ka Tchaourou, ahiganje abayoboke b'uwahoze ari Perezida Boni Yayi, za bariyeri (barrières) zashyizweho n'abigaragambya zabujije amatora kuba.
Ibi bibazo ntabwo byahungabanyije kwemerwa kw'amatora, nkuko umukuru w'akanama k'amatora yabivuze.
