Sarah Obama: Abategetsi ba Kenya baravuga agahinda batewe n’uru rupfu

Ubutumwa bw'agahinda no kwihanganisha abasigaye bukomeje kwisuka kubera urupfu rwa Sarah Obama ufatwa nka nyirakuru wa Barack Obama wahoze ari perezida wa Amerika.

Sarah Obama wari ufite imyaka 99, yapfuye kuwa mbere mu gitondo mu bitaro bya Jaramogi Oginga Odinga byo mu mujyi wa Kisumu mu burengerazuba bwa Kenya, nk'uko abategetsi babivuga.

Perezida Uhuru Kenyatta wa Kenya yavuze ko yari "inyenyeri y'indagagaciro z'umuryango".

Barack Obama yitaga uyu mukecuru 'nyogokuru Sarah'.

Sarah Onyango Obama yari umugore wa gatatu w'umugabo wabyaye Barack Obama Sr, se wa Barack Obama wabaye perezida wa Amerika.

Uwahoze ari minisitiri w'intebe Raila Odinga yashimiye Sarah Obama uko yayoboye umuryango nyuma y'urupfu rw'uwari umugabo we.

Ati: "Yakoresheje ukuzamuka kw'umwuzukuru we mu guteza imbere uburezi bw'abakobwa, no kurwanya amabi mu bantu mu muryango yashinze".

Auma Obama, umuvandimwe kuri se wa Barack Obama, yatangaje ubutumwa kuri Twitter ko "ashengutse umutima", ariko "yahiriwe no kumugira igihe kirekire".

Anyang Nyong'o, guverineri w'intara ya Kisumu yavuze ko Sarah Obama yari umunyarugwiro kuri buri wese wajyaga kumusura mu rugo rwe i Kogelo.

Nyong'o yavuze ko Sarah yapfuye azize indwara amaranye igihe gito itatangajwe.

Sarah yabaga ahitwa Nyang'oma Kogelo, muri hafi 50Km uvuye mu mujyi wa Kisumu uri mu majyepfo ashyira uburengerazuba bwa Kenya.