Guinea: Cellou Dalein Diallo utavuga rumwe n'ubutegetsi yitangaje ko yatsinze amatora
Ahavuye isanamu, AFP
Cellou Dalein Diallo utavuga rumwe n'ubutegetsi muri Guinea yitangaje ko ari we watsinze amatora ya perezida yabaye ku cyumweru, mbere yuko bitangazwa n'akanama k'amatora.
Bwana Diallo w'imyaka 68, yabwiye abanyamakuru n'abamushyigikiye ko yatsinze amatora nubwo bwose "hari ibitaragenze neza".
Akanama k'amatora kavuze ko kubarura amajwi bigikomeje kandi ko ari ko konyine gafite ububasha bwo gutangaza uwatsinze amatora.
Abamushyigikiye bari bigabije imihanda kwishimira iyo ntsinzi ivugwa n'umukandida wabo, batatanyijwe na polisi.
Nyuma yaho, Bwana Diallo yatangaje kuri Twitter ko abantu batatu bishwe naho abandi benshi bagakomeretswa na polisi.
Abaturage ba Guinea bari bamaze amezi bakora imyigaragambyo yo kwamagana icyemezo cya Perezida Alpha Condé, w'imyaka 82, cyo kwiyamamariza manda ya gatatu itavugwaho rumwe.
Ahavuye isanamu, EPA
Ibyavuye muri aya matora, yabaye mu mwuka w'ubushyamirane bukomeye, byitezwe ko bitangazwa ejo ku wa gatatu.
Nyuma yuko bitangajwe, abakandida bazaba bafite igihe cy'iminsi umunani yo kuba babijuririra.
Umukandida - muri 12 biyamamaje - acyeneye kubona amajwi arenga 50% kugira ngo atangazwe ko yatsinze amatora.
Bitaba ibyo hakitabazwa amatora y'icyiciro cya kabiri ku itariki ya 24 y'ukwa 11.
