Guinea-Conakry 'yafunze imipaka' n'abaturanyi mbere yuko amatora aba

Inyandiko gusa
Perezida Alpha Condé arimo gushaka manda ya gatatu itavugwaho rumwe

Ahavuye isanamu, Getty Images

Insiguro y'isanamu, Perezida Alpha Condé arimo gushaka manda ya gatatu itavugwaho rumwe

Ibiro ntaramakuru AFP byasubiyemo amagambo y'umutegetsi wo muri leta ya Guinée-Conakry avuga ko iki gihugu cyafunze imipaka igihuza na Sénégal na Guinée-Bissau, mbere yuko amatora rusange aba.

Uwo mutegetsi utatangajwe izina yabwiye AFP ko iyo mipaka yafunzwe ku mpamvu z'umutekano.

Botche Candé, Minisitiri w'ubutegetsi bw'igihugu wa Guinée-Bissau, yavuze ko uwo mupaka wafunzwe guhera ku cyumweru, ariko minisitiri mugenzi we wo muri Guinée-Conakry ntiyabyemeje.

Perezida Alpha Condé wa Guinée-Conakry, w'imyaka 82, arimo gushaka manda ya gatatu itavugwaho rumwe, mu matora rusange ateganyijwe kuba ku itariki ya 18 y'ukwezi gutaha kwa cumi.

Bwana Condé yishyingikirije itegekonshinga rishya abasha kwemererwa kurenza manda ebyiri ntarengwa kuri perezida.